ಆತಂಕ ಬೇಡ; ರೂಪಾಯಿ ಸ್ಥಿತಿ ಉತ್ತಮ: ವಿತ್ತ ಸಚಿವೆ

ಹೊಸದಿಲ್ಲಿ/ಮುಂಬಯಿ: ಜಗತ್ತಿನ ಇತರ ರಾಷ್ಟ್ರಗಳಿಗೆ ಹೋಲಿಕೆ ಮಾಡಿದರೆ ರೂಪಾಯಿ ಅತ್ಯಂತ ಉತ್ತಮ ಸ್ಥಿತಿಯಲ್ಲಿದೆ ಎಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಹೇಳಿದ್ದಾರೆ.

ಹೊಸದಿಲ್ಲಿಯಲ್ಲಿ ಗುರುವಾರ ಮಾತನಾಡಿದ ಅವರು, ದೇಶದ್ದು ಮುಚ್ಚಿದ ಅರ್ಥ ವ್ಯವಸ್ಥೆ ಅಲ್ಲ. ಜಗತ್ತಿನ ಇತರ ಭಾಗಗಳ ಉದ್ಯಮ ಮತ್ತು ವ್ಯಾಪಾರ ಕ್ಷೇತ್ರದಲ್ಲಿ ಉಂಟಾದ ಬೆಳವಣಿಗೆ ದೇಶದ ಮೇಲೂ ಉಂಟಾಗುತ್ತದೆ. ಇದರ ಹೊರತಾಗಿಯೂ ನಮ್ಮ ದೇಶದ ರೂಪಾಯಿ ಉತ್ತಮ ಸ್ಥಿತಿಯಲ್ಲಿಯೇ ಇದೆ ಎಂದಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಅಮೆರಿಕದ ಡಾಲರ್‌ ಎದುರು ರೂಪಾಯಿ ಮೌಲ್ಯ ಕುಸಿತ ಕಾಣುತ್ತಿರುವ ಹಿನ್ನೆಲೆಯಲ್ಲಿ ವಿತ್ತ ಸಚಿವ ಹೇಳಿಕೆ ಮಹತ್ವ ಪಡೆದಿದೆ. ಇದೇ ವೇಳೆ ಗುರುವಾರ ಬಿಡುಗಡೆಯಾಗಿರುವ ಆರ್‌ಬಿಐನ 25ನೇ ಆರ್ಥಿಕ ಸ್ಥಿರತೆ ವರದಿ (ಎಫ್ಎಸ್‌ಆರ್‌)ಯಲ್ಲಿ ಕೂಡ ಜಗತ್ತಿನ ಇತರ ರಾಷ್ಟ್ರಗಳ ಕರೆನ್ಸಿಗೆ ಹೋಲಿಕೆ ಮಾಡಿದರೆ, ರೂಪಾಯಿ ಉತ್ತಮ ಸ್ಥಿತಿಯಲ್ಲಿಯೇ ಇದೆ ಎಂದು ಅಭಿಪ್ರಾಯಪಟ್ಟಿದೆ. ಜಗತ್ತಿನ ಬದಲಾವಣೆಗೆ ಅದು ಹೊಂದಿಕೊಳ್ಳುತ್ತದೆ ಎಂದೂ ಅದರಲ್ಲಿ ಉಲ್ಲೇಖೀಸಲಾಗಿದೆ.

ದಾಖಲೆ ಕುಸಿತ: ಗುರುವಾರ ಕೂಡ ಅಮೆರಿಕದ ಡಾಲರ್‌ ಎದುರು ರೂ.3 ಪೈಸೆ ಕುಸಿತ ಕಂಡಿದೆ. ಹೀಗಾಗಿ ದಾಖಲೆಯ 79.06 ರೂ.ಗಳಿಗೆ ವಹಿವಾಟು ಮುಕ್ತಾಯವಾಗಿದೆ. ಕಳೆದ ಶುಕ್ರವಾರ ಕುಸಿತವನ್ನೂ ಗಣನೆಗೆ ತೆಗೆದುಕೊಂಡರೆ, ಇದು 5ನೇ ದಿನದ ಇಳಿಕೆಯಾಗಿದೆ. ಮಧ್ಯಂತರ­ದಲ್ಲಿ 79.07 ರೂ. ವರೆಗೆ ಇಳಿಕೆ­ಯಾ­ಗಿತ್ತು. ಬುಧವಾರ 79 ರೂ.ವರೆಗೆ ಕುಸಿತ ಕಂಡು ದಾಖಲೆ ನಿರ್ಮಿಸಿತ್ತು.