ಎಸ್‌ಎಂಒಐನಿಂದ ರೇಷಮ್‌ಘರ್‌ಗೆ ಚಾಲನೆ

ಬೆಂಗಳೂರು: ಸಿಲ್ಕ್ಮಾರ್ಕ್‌ ಆರ್ಗನೈಸೇಷನ್‌ ಆಫ್‌ ಇಂಡಿಯಾ (ಎಸ್‌ಎಂಒಐ) ನಗರದ ಮಹಾತ್ಮ ಗಾಂಧಿ ರಸ್ತೆಯ ಶುಭರಾಮ್‌ ಕಾಂಪ್ಲೆಕ್ಸ್‌ನಲ್ಲಿ ಸೆಂಟ್ರಲ್‌ ಕಾಟೇಜ್‌ ಇಂಡಸ್ಟ್ರೀಸ್‌ ಕಾರ್ಪೊರೇಷನ್‌ ಸಹಯೋಗದಲ್ಲಿ ಶುದ್ಧ ದೇಶೀಯ ರೇಷ್ಮೆ ಸೀರೆಗಳ ಪ್ರದರ್ಶನ ಮತ್ತು ಮಾರಾಟ ರೇಷಮ್‌ಘರ್‌ ಅನ್ನು ಹಮ್ಮಿಕೊಂಡಿದೆ.

ಜ.5 ರವರೆಗೆ ನಡೆಯಲಿರುವ ರೇಷಮ್‌ಘರ್‌ ಪ್ರರ್ದಶನ, ಮಾರಾಟಕ್ಕೆ ನಟಿ ಖುಷಿ ಗೌಡ ಸೋಮವಾರ ಚಾಲನೆ ನೀಡಿದರು. ಕ್ರಿಸ್ಮಸ್‌ ಮತ್ತು ನೂತನ ವರ್ಷ ಪ್ರಯುಕ್ತ ಆಯೋಜಿಸಿರುವ ಶೇ. 100 ರಷ್ಟು ಅಪ್ಪಟ ರೇಷ್ಮೆ ಸೀರೆಗಳ ಪ್ರರ್ದಶನ- ಮಾರಾಟದಲ್ಲಿ ವಿಶೇಷ ರೀತಿಯಲ್ಲಿ ತಯಾರಿಸಲಾದ ರೇಷ್ಮೆಯ ವೈವಿಧ್ಯತೆಗಳನ್ನು ಕಾಣಬಹುದಾಗಿದೆ.

ಮಲ್ಬರಿ, ಟಸ್ಸಾರ್‌, ಏರಿ, ಮುಗ, ಕಾಂಚೀಪುರಂ, ಪೋಚಮ್‌ಪಲ್ಲಿ, ಮೈಸೂರು, ಬನಾರಸ್‌ ಹಾಗೂ ಮುಂತಾದ ಕಡೆಯ ರೇಷ್ಮೆ ಉತ್ಪನ್ನಗಳು ಲಭಿಸಲಿದ್ದು, ರೇಷ್ಮೆ ಪ್ರೇಮಿಗಳಿಗೆ ಅದ್ಭುತ ಶಾಪಿಂಗ್‌ ಅನುಭವ ಇದಾಗಲಿದೆ. ಈ ವಿಶೇಷ ಸಂದರ್ಭದಲ್ಲಿ ಗ್ರಾಹಕರಿಗೆ ಆಯ್ದ ಉತ್ಪನ್ನಗಳ ಮೇಲೆ ಶೇ.10 ರಷ್ಟು ರಿಯಾಯಿತಿ ಹಾಗೂ ಶುದ್ಧತೆಯ ಗ್ಯಾರಂಟಿ ಕೂಡ ಲಭಿಸಲಿದೆ.

ಗ್ರಾಹಕರು ಖರೀದಿಸಿದ ಪ್ರತಿ ಉತ್ಪನ್ನದೊಂದಿಗೆ ನ್ಯಾಚುರಲ್‌ ಸಿಲ್ಕ್ ಮತ್ತು ಸಿಲ್ಕ್ ಮಾರ್ಕ್‌ ಲೇಬಲ್‌ಗ‌ಳನ್ನು ನೀಡಲಾಗುತ್ತದೆ. ಸಿಲ್ಕ್ ಟೆಸ್ಟಿಂಗ್‌ ಕೌಂಟರ್‌ ಕೂಡ ಅಳವಡಿಸಲಾಗಿದ್ದು, ಗ್ರಾಹಕರು ತಾವು ಖರೀದಿಸಿದ ರೇಷ್ಮೆ ಉತ್ಪನ್ನಗಳ ಶುದ್ಧತೆಯನ್ನು ಸ್ಥಳದಲ್ಲೇ ಖಾತ್ರಿ ಪಡಿಸಿಕೊಳ್ಳುವ ಅವಕಾಶ ಕಲ್ಪಿಸಲಾಗಿದೆ ಎಂದು ಎಸ್‌ಎಂಒಐನ ಸಿಇಒ ಕೆ.ಎಸ್‌. ಗೋಪಾಲ್‌ ಅವರು ತಿಳಿಸಿದ್ದಾರೆ.