ಕ್ರಿಕೆಟ್‌ ಕೋಚ್‌ ಹುದ್ದೆಗೆ ರಾಬಿನ್‌ ಸಿಂಗ್‌ ಅರ್ಜಿ

ಹೊಸದಿಲ್ಲಿ: ಮಾಜಿ ಆಲ್‌ರೌಂಡರ್‌ ರಾಬಿನ್‌ ಸಿಂಗ್‌ ಭಾರತದ ಕ್ರಿಕೆಟ್‌ ಕೋಚ್‌ ಹುದ್ದೆಗೆ ಅರ್ಜಿ ಸಲ್ಲಿಸಿದ್ದಾರೆ.

55ರ ಹರೆಯದ ರಾಬಿನ್‌ ಸಿಂಗ್‌ 2007-09ರ ಅವಧಿಯಲ್ಲಿ ಟೀಮ್‌ ಇಂಡಿಯಾದ ಫೀಲ್ಡಿಂಗ್‌ ಕೋಚ್‌ ಆಗಿದ್ದರು. 2023ರ ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾವಳಿಗೆ ಭಾರತವನ್ನು ಈಗಿಂದಲೇ ಸಜ್ಜುಗೊಳಿಸುವುದು ತಮ್ಮ ಗುರಿ ಎಂಬುದಾಗಿ ಅವರು ಹೇಳಿದ್ದಾರೆ.

“ಈಗಿನ ಕೋಚ್‌ ಅಧಿಕಾರವಧಿಯಲ್ಲಿ ಭಾರತ ಸತತ 2 ವಿಶ್ವಕಪ್‌ ಸೆಮಿಫೈನಲ್‌ಗ‌ಳಲ್ಲಿ ಸೋಲನುಭವಿಸಿತು. ಟಿ20 ವಿಶ್ವಕಪ್‌ನಲ್ಲೂ ಇದೇ ಸಂಕಟಕ್ಕೆ ಸಿಲುಕಿತ್ತು. 2023ರ ವಿಶ್ವಕಪ್‌ಗೆ ತಂಡವನ್ನು ಸಜ್ಜುಗೊಳಿಸಲು, ಅಗತ್ಯ ಬದಲಾವಣೆ ಮಾಡಲು ಇದು ಸಕಾಲ’ ಎಂಬುದಾಗಿ ರಾಬಿನ್‌ ಸಿಂಗ್‌ ಹೇಳಿದರು.

ರಾಬಿನ್‌ ಸಿಂಗ್‌ ಭಾರತದ ಅಂಡರ್‌-19 ಮತ್ತು ಭಾರತ “ಎ’ ತಂಡಗಳಿಗೂ ಕೋಚ್‌ ಆಗಿದ್ದರು. ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್‌ ಸಹಾಯಕ ಕೋಚ್‌ ಆಗಿಯೂ ದುಡಿದಿದ್ದರು.