ಕಾರಡ್ಕದಲ್ಲಿ ಬೈಕ್ –ಕಾರು ಢಿಕ್ಕಿ: ದಂಪತಿ ಸಾವು

ಕಾಸರಗೋಡು: ಮುಳ್ಳೇರಿಯಾ- ಬದಿಯಡ್ಕ ರಸ್ತೆಯ ಕಾರಡ್ಕ 13ನೇ ಮೈಲಿನಲ್ಲಿ ಸೋಮವಾರ ಬೆಳಗ್ಗೆ 11 ಗಂಟೆಗೆ ಕಾರು ಢಿಕ್ಕಿ ಹೊಡೆದು ಬೈಕ್‌ ಸವಾರ ದಂಪತಿ ಸಾವಿಗೀಡಾದ ಘಟನೆ ನಡೆದಿದೆ.

ಮುಳ್ಳೇರಿಯ ಎ.ಎ. ಕಾಂಪ್ಲೆಕ್ಸ್‌ನಲ್ಲಿ ಕ್ಷೌರದ ಅಂಗಡಿ ನಡೆಸುವ ಗೋವಿಂದ ರಾಜು (52), ಪತ್ನಿ ಉಮಾ (43) ಅವರು ಸ್ಥಳದಲ್ಲೇ ಸಾವಿಗೀಡಾದರು.

ಗೋವಿಂದ ರಾಜು ಮತ್ತು ಪತ್ನಿ ಉಮಾ ಸಂಚರಿಸುತ್ತಿದ್ದ ಬೈಕ್‌ಗೆ ಅತೀ ವೇಗದಲ್ಲಿ ಬಂದ ಕಾರು ಢಿಕ್ಕಿ ಹೊಡೆದು ಅಪಘಾತ ಸಂಭವಿಸಿದೆ.

ತಮಿಳುನಾಡು ನಿವಾಸಿಯಾದ ಗೋವಿಂದ ರಾಜು ಹಲವು ವರ್ಷಗಳಿಂದ ಕಾರಡ್ಕದಲ್ಲಿ ವಾಸ್ತವ್ಯ ಹೂಡಿದ್ದಾರೆ. ಮೃತರು ಮಕ್ಕಳಾದ ಸೆಂದಿಲ್‌ ಕುಮಾರ್‌, ಶರ್ಮಿಳಾ, ಶರತ್‌ ಕುಮಾರ್‌ ಮೊದಲಾದವರನ್ನು ಅಗಲಿದ್ದಾರೆ.

ಆದೂರು ಎ.ಎಸ್‌.ಐ. ಮೋಹನನ್‌ ನೇತೃತ್ವದಲ್ಲಿ ಪೊಲೀಸರು ಸ್ಥಳಕ್ಕೆ ಧಾವಿಸಿ ತನಿಖೆ ನಡೆಸಿದರು.