ಶುರುವಾಯ್ತು ರಿಷಭ್‌ ಶೆಟ್ಟಿ ಹೊಸ ಚಿತ್ರ

“ಕಿರಿಕ್‌ ಪಾರ್ಟಿ’ ಚಿತ್ರದ ನಂತರ ರಿಷಭ್‌ ಶೆಟ್ಟಿ “ಕಥಾ ಸಂಗಮ’ ಎಂಬ ಚಿತ್ರವನ್ನು ನಿರ್ಮಿಸಿದರೆ, ಮಕ್ಕಳ ಚಿತ್ರವೊಂದನ್ನು ನಿರ್ದೇಶಿಸುವುದಾಗಿ ಹೇಳಿಕೊಂಡಿದ್ದರು. ಆ ಚಿತ್ರದ ಹೆಸರೇನು ಗೊತ್ತಾ? “ಸರ್ಕಾರಿ ಹಿ.ಪ್ರಾ. ಶಾಲೆ ಕಾಸರಗೋಡು, ಕೊಡುಗೆ: ರಾಮಣ್ಣ ರೈ’. ಹೆಸರು ಘೋಷಿಸಿ ಕೆಲವು ದಿನಗಳ ನಂತರ, ಈ ಚಿತ್ರದಲ್ಲಿ ಅನಂತ್‌ನಾಗ್‌ ಅವರು ಒಂದು ಪ್ರಮುಖ ಪಾತ್ರದಲ್ಲಿ ನಟಿಸುವುದಾಗಿ ಹೇಳಿದ್ದರು. ಈಗ ಈ ಚಿತ್ರಕ್ಕೆ ಕೊನೆಗೂ ಚಾಲನೆ ಸಿಕ್ಕಿದೆ.

ಹೌದು, “ಸರ್ಕಾರಿ ಹಿ.ಪ್ರಾ. ಶಾಲೆ ಕಾಸರಗೋಡು, ಕೊಡುಗೆ: ರಾಮಣ್ಣ ರೈ’ ಚಿತ್ರಕ್ಕೆ ಕೊನೆಗೂ ಚಾಲನೆ ಸಿಕ್ಕಿದೆ. ಇತ್ತೀಚೆಗೆ ಕಾಸರಗೋಡಿನಲ್ಲಿ ಚಿತ್ರದ ಮುಹೂರ್ತ ನಡೆದಿದೆ. ರಿಷಭ್‌ ಶೆಟ್ಟಿ, ಛಾಯಾಗ್ರಾಹಕ ವೆಂಕಟೇಶ್‌ ಅಂಗುರಾಜ್‌ ಸೇರಿದಂತೆ ಹಲವರು ಈ ಸಂದರ್ಭದಲ್ಲಿ ಭಾಗವಹಿಸಿದ್ದರು. ಇನ್ನು ಚಿತ್ರೀಕರಣ ಶುರುವಾಗಲಿದ್ದು, ಸತತವಾಗಿ ಮುಂದುವರೆಯಲಿದೆ. ಹೆಸರಿಗೆ ತಕ್ಕಂತೆ ಕನ್ನಡ ಶಾಲೆಗಳ ಬಗ್ಗೆ ಸಿನಿಮಾ ಮಾಡುವುದಕ್ಕೆ ಹೊರಟಿದ್ದಾರೆ ರಿಷಭ್‌.

ಕಾಸರಗೋಡಿನಲ್ಲಿ ಕನ್ನಡ ಶಾಲೆ ಎಂದರೆ, ಕಥೆ ಏನಿರಬಹುದು ಎಂಬ ಯೋಚನೆ ಒಂದು ಕ್ಷಣ ಬರಬಹುದು. ಕನ್ನಡ ಶಾಲೆಗಳು ಮುಚ್ಚುವ ಹಂತಕ್ಕೆ ಬಂದಿರೋದನ್ನು ಸಂಪೂರ್ಣ ಹಾಸ್ಯಮಯವಾಗಿ ಹೇಳುವುದಕ್ಕೆ ಹೊರಟಿದ್ದಾರಂತೆ ರಿಷಭ್‌. ಅದರಲ್ಲೂ ಕಾಸರಗೋಡು ಹಿನ್ನೆಲೆಯಲ್ಲಿ ಕಥೆ ಸಾಗುತ್ತದಂತೆ. “ಸರಿಯಾಗಿ ಹೇಳಬೇಕೆಂದರೆ, ಇದು “ಕಿರಿಕ್‌ ಪಾರ್ಟಿ’ಯ ಮಕ್ಕಳ ವರ್ಷನ್‌ ಎಂದರೆ ತಪ್ಪಿಲ್ಲ. ಸಂಪೂರ್ಣ ಹಾಸ್ಯಮಯವಾಗಿರುತ್ತದೆ’ ಎನ್ನುತ್ತಾರೆ ರಿಷಭ್‌.