Rhumi-1; ದೇಶದ ಮೊದಲ ಮರು ಬಳಕೆ ರಾಕೆಟ್‌ ಉಡಾವಣೆ ನಾಳೆ

ಚೆನ್ನೈ: ದೇಶದ ಮೊದಲ ಮರುಬಳಕೆಯ ಹೈಬ್ರಿಡ್‌ ರಾಕೆಟ್‌ “ರುಮಿ-1′ ಅನ್ನು ಆ.24ರಂದು ಉಡಾವಣೆ ಮಾಡಲು ತಮಿಳುನಾಡು ಮೂಲದ ಸ್ಟಾರ್ಟ್‌ಅಪ್‌ ಸ್ಪೇಸ್‌ ಜೋನ್‌ ಇಂಡಿಯಾ ಸಿದ್ಧತೆ ನಡೆಸಿದೆ. ಚೆಂಗಾಲ್‌ಪಟ್ಟುವಿನ ಬಳಿಯ ಕರಾವಳಿ ಗ್ರಾಮ ತಿರುವಿದಂಡೈನಲ್ಲಿ ಮೊಬೈಲ್‌ ಲಾಂಚರ್‌ ಮೂಲಕ ಉಡಾವಣೆ ಮಾಡಲು ಸಂಸ್ಥೆ ಯೋಜಿಸಿದೆ.

ಈ ರಾಕೆಟ್‌ 3 ಘನ ಉಪಗ್ರಹಗಳು ಹಾಗೂ 50 ಪಿಕೊ ಉಪಗ್ರಹಗಳನ್ನು 35 ಕಿ.ಮೀ. ನಲ್ಲಿನ ಉಪಕಕ್ಷೀಯ ಪಥಕ್ಕೆ ಕೊಂಡೊಯ್ಯಲಿದೆ. ಬಳಿಕ ಅಲ್ಲಿ ಪೇಲೋಡ್‌ಗಳನ್ನು ಇಳಿಸಿ ರಾಕೆಟ್‌ ಮರಳಲಿದೆ. ಸಮುದ್ರಕ್ಕೆ ರಾಕೆಟ್‌ ಅಪ್ಪಳಿಸುವಂತೆ ಇದನ್ನು ವಿನ್ಯಾಸಗೊಳಿಸಲಾಗಿದ್ದು ಅಲ್ಲಿಂದ ಅದನ್ನು ಮರಳಿ ಉಪಯೋಗಿಸಲಾಗುತ್ತದೆ ಎಂದು ಸಂಸ್ಥೆ ಹೇಳಿಕೊಂಡಿದೆ.