ರಕ್ತದಲ್ಲಿರುವ ಪ್ರತಿರೋಧಕಗಳೇ ಕೋವಿಡ್‌ಗೆ ಮದ್ದು

ವಾಷಿಂಗ್ಟನ್‌: ಕೋವಿಡ್‌ನಿಂದ ಗುಣಮುಖರಾದ ರೋಗಿಗಳ ದೇಹದಲ್ಲಿರುವ ಪ್ರತಿರೋಧಕಗಳೇ ಕೋವಿಡ್‌ಗೆ ಔಷಧ ಎಂಬುದನ್ನು ಅಮೆರಿಕದ ವಿಜ್ಞಾನಿಗಳು ಹೇಳಿದ್ದಾರೆ.  ಇಂತಹ ಪ್ರತಿರೋಧಕಗಳನ್ನು ರೋಗಿಗೆ ನೀಡುವುದರಿಂದ ಕೋವಿಡ್‌ ಆರಂಭದ ಹಂತದಲ್ಲಿ ಸಾಕಷ್ಟು ಪ್ರಯೋಜನವಾಗುತ್ತದೆ. ಇದು ವೈರಸ್‌ ಮಟ್ಟವನ್ನು ಕಡಿಮೆಗೊಳಿಸಲು ಸಹಾಯ ಮಾಡುತ್ತದೆ. ಅಲ್ಲದೇ ಹಲವು ರೋಗಗಳ ವಿರುದ್ಧ ರೋಗನಿರೋಧಕ ಶಕ್ತಿಯನ್ನು ನೀಡುತ್ತದೆ ಎಂದು ಸ್ಕ್ರಿಪ್ಸ್‌ ವಿಶ್ವವಿದ್ಯಾಲಯದ ಸಂಶೋಧಕರು ಹೇಳಿದ್ದಾರೆ.

ಕೋವಿಡ್‌ಗೆ ಸರಿಯಾದ ಔಷಧ ಸಿಗುವಲ್ಲಿವರೆಗೆ ಪ್ರತಿರೋಧಕಗಳನ್ನು ತಾತ್ಕಾಲಿಕ ಔಷಧವಾಗಿ ಉಪಯೋಗಿಸಬಹುದು. ಇದು ವೈದ್ಯಕೀಯ ಸಿಬಂದಿ, ವೃದ್ಧರಿಗೆ ಪ್ರಯೋಜವಾಗುತ್ತದೆ. ಅಲ್ಲದೇ ಸಾಮಾನ್ಯ ಔಷಧಗಳಿಗೆ ಅಷ್ಟೊಂದು ಪ್ರತಿಕ್ರಿಯೆ ನೀಡದ ರೋಗಿಗಳಿಗೆ ಪ್ರಯೋಜವಾಗುತ್ತದೆ ಎಂದು ಹೇಳಲಾಗಿದೆ. ಸಂಶೋಧನೆ ಕುರಿತ ವರದಿಯನ್ನು “ಸೈನ್ಸ್‌’ ನಿಯತಕಾಲಿಕೆಯಲ್ಲಿ ಪ್ರಕಟಿಸಲಾಗಿದೆ. ರಕ್ತದ ಪ್ರತಿರೋಧಕಗಳ ಬಗ್ಗೆ ಇನ್ನಷ್ಟು ಪರೀಕ್ಷೆ ನಡೆಯಬೇಕಿದೆ. ದೊಡ್ಡ ಮಟ್ಟದಲ್ಲಿ ಪ್ರತಿರೋಧಕಗಳನ್ನು ಜನರಿಗೆ ನೀಡಿದಾಗ ಕೋವಿಡ್‌ ಮೇಲೆ ಅದು ಹೇಗೆ ಪರಿಣಾಮ ಬೀರುತ್ತದೆ ಎಂಬುದನ್ನು ಪರೀಕ್ಷಿಸಬೇಕಿದೆ ಎಂದು ಹೇಳಿದ್ದಾರೆ. ಅಲ್ಲದೇ ಸೋಂಕಿನಿಂದ ಚೇತರಿಸಿಕೊಂಡವರ ರಕ್ತದಿಂದ ಪ್ರತಿರೋಧಕಗಳನ್ನು ತೆಗೆದು ನೀಡಿದಾಗ ಅದು ವೈರಸ್‌ ಜೀವಕೋಶಗಳ ಮೇಲೆ ಹಾನಿ ಮಾಡುವುದನ್ನು ತಡೆಯುತ್ತದೆ. ಇದು ರಕ್ತದಲ್ಲಿ ಸಂಚರಿಸುತ್ತ, ಹಲವು ವಾರಗಳ ಕಾಲ ವೈರಸ್‌ ಹಾನಿಮಾಡುವುದನ್ನು ತಪ್ಪಿಸುತ್ತದೆ ಎಂದು ಸಂಶೋಧನ ಲೇಖನದಲ್ಲಿ ಹೇಳಲಾಗಿದೆ.