ರಾಜ್ಯದಲ್ಲಿ 18,618 ಶಾಲಾ ಕೊಠಡಿಗಳ ದುರಸ್ತಿ: ಸಚಿವ ಬಿ.ಸಿ.ನಾಗೇಶ್‌

ಸುವರ್ಣ ವಿಧಾನಸೌಧ: ರಾಜ್ಯದಲ್ಲಿ 18,618 ಶಾಲಾ ಕೊಠಡಿಗಳ ದುರಸ್ತಿ ಹಾಗೂ 8100 ಹೊಸ ಕಟ್ಟಡ ನಿರ್ಮಾಣ ಕಾಮಗಾರಿಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಶಿಕ್ಷಣ ಸಚಿವ ಬಿ.ಸಿ.ನಾಗೇಶ್‌ ತಿಳಿಸಿದ್ದಾರೆ.

ಗುರುವಾರ ಪ್ರಶ್ನೋತ್ತರ ವೇಳೆ ಕಾಂಗ್ರೆಸ್‌ ಶಾಸಕ ಪ್ರಿಯಾಂಕ್‌ ಖರ್ಗೆ, ಶೇ.60 ರಷ್ಟು ಶಾಲಾ ಕೊಠಡಿಗಳು ದುರಸ್ತಿಯಾಗಬೇಕಿವೆ. ಇದಕ್ಕಾಗಿ 2682 ಕೋಟಿ ರೂ. ಅಗತ್ಯವಿದೆ ಎಂದು ಉತ್ತರಿಸಿದ್ದೀರಿ. ಪಠ್ಯಪುಸ್ತಕ ಬದಲಿಸುವುದು, ಕೇಸರೀಕರಣ ಮಾಡುವ ಬದಲು ಶಾಲಾ ಕೊಠಡಿ ದುರಸ್ತಿಗೆ ಆದ್ಯತೆ ನೀಡಬೇಕಿತ್ತು ಎಂದು ಹೇಳಿದರು.

ಇದಕ್ಕೆ ಉತ್ತರಿಸಿದ ಸಚಿವರು, ಪ್ರತಿ ವರ್ಷ ಸಾಧಾರಣವಾಗಿ ಕನಿಷ್ಠ 3 ಸಾವಿರ ಶಾಲಾ ಕೊಠಡಿಗಳು ಸಣ್ಣ-ಪುಟ್ಟ ದುರಸ್ತಿಗೆ ಬಂದೇ ಬರುತ್ತದೆ. ಹಿಂದಿನ ಸರಕಾರಗಳು ಸಕಾಲದಲ್ಲಿ ಕಟ್ಟಡ ರಿಪೇರಿಗೆ ಮುಂದಾಗಿದ್ದರೆ ನಮಗೆ ಇಷ್ಟು  ದೊಡ್ಡ ಪ್ರಮಾಣದ ದುರಸ್ತಿ ಮಾಡುವ ಸ್ಥಿತಿ ಬರುತ್ತಿರಲಿಲ್ಲ. 2013ರಿಂದ 2017 ರ ವರೆಗೆ ಶಾಲಾ ಕೊಠಡಿಯ ದುರಸ್ತಿಯನ್ನಾಗಲೀ, ಹೊಸ ಶಾಲಾ ಕೊಠಡಿ ನಿರ್ಮಾಣ ಕಾಮಗಾರಿಯನ್ನಾಗಿ ಸರಿಯಾಗಿ ಕೈಗೊಳ್ಳಲಿಲ್ಲ. 2017-18 ರಲ್ಲಿ 3617 ಕಟ್ಟಡ ಕಟ್ಟಿ, 5731 ಕೊಠಡಿ ದುರಸ್ತಿ ಮಾಡಿದರು ಎಂದು ತಿಳಿಸಿದರು.