ಗ್ರಾಹಕರ ಡೇಟಾ ರಕ್ಷಿಸಲು ಆರ್‌ಬಿಐನಿಂದ ನೂತನ ಮಾರ್ಗಸೂಚಿ

ನವದೆಹಲಿ: ಸಾಲಗಾರರು ಮತ್ತು ಗ್ರಾಹಕರ ಮಾಹಿತಿ ರಕ್ಷಿಸಲು ಮತ್ತು ಅದು ದುರುಪಯೋಗವಾಗದಂತೆ ತಡೆಯುವ ನಿಟ್ಟಿನಲ್ಲಿ ಬ್ಯಾಂಕ್‌ಗಳು ಮತ್ತು ಸಾಲದಾತ ಸಂಸ್ಥೆಗಳಿಗೆ ನೂತನ ಮಾರ್ಗಸೂಚಿಗಳನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌(ಆರ್‌ಬಿಐ) ಹೊರಡಿಸಿದೆ.

ಮಾರ್ಗಸೂಚಿಗಳು ತಕ್ಷಣವೇ ಅನ್ವಯವಾಗಲಿದ್ದು, ನ.30ರೊಳಗೆ ಪೂರ್ಣ ಪ್ರಮಾಣದಲ್ಲಿ ಜಾರಿಗೊಳಿಸಬೇಕು ಎಂದು ಆರ್‌ಬಿಐ ಸೂಚಿಸಿದೆ. ಅದರಂತೆ, ನಿರ್ದಿಷ್ಟ ಮಾಹಿತಿ ಹೊರತುಪಡಿಸಿ ಸಾಲಗಾರರ ಯಾವುದೇ ಮಾಹಿತಿಯನ್ನು ಬ್ಯಾಂಕುಗಳು ಹಾಗೂ ಸಾಲದಾತ ಸಂಸ್ಥೆಗಳು ಸಂಗ್ರಹಿಸುವಂತಿಲ್ಲ.

ಮಾರ್ಗಸೂಚಿಗಳ ಪ್ರಕಾರ, ಡಿಜಿಟಲ್‌ ಲೆಂಡಿಂಗ್‌ ಅಪ್ಲಿಕೇಶನ್‌(ಡಿಎಲ್‌ಎ) ಅಥವಾ ಸಾಲ ನೀಡುವ ಸೇವಾ ಪೂರೈಕೆದಾರರು(ಎಲ್‌ಪಿಎಸ್‌) ಕೆಲವು ಮೂಲಭೂತ ಮಾಹಿತಿ ಹೊರತುಪಡಿಸಿ, ಸಾಲಗಾರನ ಯಾವುದೇ ವೈಯಕ್ತಿಕ ಮಾಹಿತಿಯನ್ನು ಸಂಗ್ರಹಿಸುವುದಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು.

ಗ್ರಾಹಕರ ಹೆಸರು, ವಿಳಾಸ, ಸಂಪರ್ಕ ವಿವರಗಳು ಇತ್ಯಾದಿಗಳನ್ನಷ್ಟೇ ಸಂಗ್ರಹಿಸಿಡಬಹುದು. ಡೇಟಾ ಗೌಪ್ಯತೆ ಮತ್ತು ಗ್ರಾಹಕರ ವೈಯಕ್ತಿಕ ಮಾಹಿತಿಯ ಭದ್ರತೆಗೆ ಸಂಬಂಧಿಸಿದ ಜವಾಬ್ದಾರಿಯು ಸಾಲದಾತ ಸಂಸ್ಥೆಗಳದ್ದೇ ಆಗಿದೆ ಎಂದು ಆರ್‌ಬಿಐ ಪ್ರತಿಪಾದಿಸಿದೆ.