ಕಾಸರಗೋಡು: ಚುನಾವಣ ಪ್ರಚಾರ ಅಂತಿಮ ಹಂತದಲ್ಲಿ ಕಾಸರಗೋಡು ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ರವೀಶ ತಂತ್ರಿ ಕುಂಟಾರು ಅವರ ಮೇಲೆ ರವಿವಾರ ಬೆಳಗ್ಗೆ ಕಾಂಞಂಗಾಡ್‌ ಸಮೀಪದ ಮಡಿಕೈಯಲ್ಲಿ ತಂಡವೊಂದು ಹಲ್ಲೆಗೆ ಯತ್ನಿಸಿದ ಘಟನೆ ನಡೆದಿದೆ.
ಹಲ್ಲೆ ತಡೆಯುವ ವೇಳೆ ನಾಲ್ಕು ಮಂದಿ ಗಾಯಗೊಂಡಿದ್ದಾರೆ. ಈ ಪೈಕಿ ಗಂಭೀರ ಗಾಯ ಗೊಂಡಿರುವ ಛಾಯಾಚಿತ್ರಗ್ರಾಹಕನನ್ನು ಕಾಂಞಂಗಾಡ್‌ನ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.
ಮಡಿಕೈ ಕೋತೋಡಪಾರದಲ್ಲಿ ರವಿವಾರ ಬೆಳಗ್ಗೆ 9.30ಕ್ಕೆ ಈ ಘಟನೆ ನಡೆದಿದೆ. ಎನ್‌ಡಿಎ ಚುನಾವಣ ಪ್ರಚಾರ ಕಾರ್ಯ ನಡೆಯುತ್ತಿದ್ದಂತೆ ಅಲ್ಲಿಗೆ ಎಡರಂಗ ಪ್ರಚಾರದ ವಾಹನಗಳು ಆಗಮಿಸಿ ಪ್ರಚಾರ ನಡೆಸುತಿದ್ದವು. ಈ ಮಧ್ಯೆ ಬೈಕ್‌ನಲ್ಲಿ ಬಂದ ವ್ಯಕ್ತಿಯೋರ್ವ ರವೀಶ ತಂತ್ರಿ ಅವರ ಸಮೀಪಕ್ಕೆ ಬಂದು ಅವರ ಕೈಯಲ್ಲಿದ್ದ ಮೈಕ್‌ ಹಿಡಿದೆಳೆದು ಹಲ್ಲೆಗೆ ಯತ್ನಿಸಿದ್ದಾನೆ. ಈ ವೇಳೆ ಕಾರ್ಯಕ್ರಮದಲ್ಲಿದ್ದ ಬಿಜೆಪಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಎ. ವೇಲಾಯುಧನ್‌, ಮಂಡಲಾಧ್ಯಕ್ಷ ಎನ್‌. ಮಧು, ಕರ್ಷಕ ಮೋರ್ಚಾ ಮುಖಂಡ ಇ. ಕೃಷ್ಣನ್‌ ಹಲ್ಲೆಯನ್ನು ತಡೆದರು. ಈ ದೃಶ್ಯವನ್ನು ಕೆಮರಾದಲ್ಲಿ ಸೆರೆಹಿಡಿಯುತ್ತಿದ್ದ ಫೋಟೋಗ್ರಾಫರ್‌ನ ಮೇಲೆಯೂ ವ್ಯಕ್ತಿ ಹಲ್ಲೆ ನಡೆಸಿ ಗಂಭೀರ ಗಾಯಗೊಳಿಸಿದ್ದಾನೆ. ಘಟನೆಯಲ್ಲಿ ನಾಲ್ವರು ಗಾಯಗೊಂಡಿದ್ದಾರೆ.
ಈ ಪೈಕಿ ಗಂಭೀರ ಗಾಯಗೊಂಡಿರುವ ಫೋಟೋಗ್ರಾಫರ್‌ ಶ್ರಾವಣ್‌ (28) ಅವರನ್ನು ಕಾಂಞಂಗಾಡ್‌ನ ಜಿಲ್ಲಾ ಆಸ್ಪತ್ರೆಗೆ ಸೇರಿಸಲಾಗಿದೆ. ಕೆಲವು ದಿನಗಳ ಹಿಂದೆ ಕಲ್ಯಾಶೆÏàರಿಯಲ್ಲಿ ರವೀಶ ತಂತ್ರಿ ಅವರ ಪ್ರಚಾರ ವಾಹನವನ್ನು ತಡೆದು ಹತ್ಯೆ ಬೆದರಿಕೆಯೊಡ್ಡಿದ ಘಟನೆ ಕೂಡ ನಡೆದಿತ್ತು.
