ಕೇಂದ್ರ ಸರಕಾರಿ ನೌಕರರ ತುಟ್ಟಿಭತ್ತೆ ಶೀಘ್ರ ಹೆಚ್ಚಳ?

ಹೊಸದಿಲ್ಲಿ: ಸದ್ಯದಲ್ಲೇ ಕೇಂದ್ರ ಸರಕಾರಿ ನೌಕರರಿಗೆ ಕೇಂದ್ರ ಸರಕಾರ ಸಿಹಿ ಸುದ್ದಿ ನೀಡುವ ಸಾಧ್ಯತೆಯಿದೆ. 7ನೇ ವೇತನ ಆಯೋಗದ ಅನ್ವಯ ಸರಕಾರಿ ನೌಕರರ ತುಟ್ಟಿ ಭತ್ತೆ (ಡಿಎ) ಮತ್ತು ಫಿಟ್ಮೆಂಟ್‌ ಅಂಶ ಹೆಚ್ಚಳದ ಕುರಿತು ಶೀಘ್ರವೇ ಘೋಷಣೆ ಮಾಡಲಾಗುತ್ತದೆ ಎಂದು ಮೂಲಗಳು ತಿಳಿಸಿವೆ.

ಫಿಟ್ಮೆಂಟ್‌ ಅಂಶ ಹೆಚ್ಚಳದಿಂದಾಗಿ ನೌಕರರ ಕನಿಷ್ಠ ಮೂಲ ವೇತನದಲ್ಲಿ ಏರಿಕೆಯಾಗಲಿದೆ. ಕೇಂದ್ರ ಸರಕಾರಿ ನೌಕರರ ಕನಿಷ್ಠ ಆದಾಯವು ಈಗಿರುವ 18 ಸಾವಿರ ರೂ.ಗಳಿಂದ 26 ಸಾವಿರ ರೂ.ಗಳಿಗೆ ಏರಿಕೆಯಾಗುವ ನಿರೀಕ್ಷೆಯಿದೆ. ಆದರೆ ಈ ಕುರಿತು ಸರಕಾರ ಇನ್ನೂ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ. ಪ್ರಸ್ತುತ ನೌಕರರಿಗೆ ಪಾವತಿಸಲಾಗುತ್ತಿರುವ ಸಾಮಾನ್ಯ ಫಿಟ್ಮೆಂಟ್‌ ಅಂಶ ಶೇ. 2.57ರಷ್ಟಿದೆ. ಇದನ್ನು ಶೇ. 3.68ಕ್ಕೆ ಏರಿಸಬೇಕು ಎಂದು ನೌಕರರು ಒತ್ತಾಯಿಸುತ್ತಿದ್ದಾರೆ.

ತುಟ್ಟಿಭತ್ತೆ ಮತ್ತು ತುಟ್ಟಿ ಪರಿಹಾರ ಮೊತ್ತವನ್ನು ವರ್ಷಕ್ಕೆ 2 ಬಾರಿ ಪರಿಷ್ಕರಿಸಲಾಗುತ್ತದೆ. ಜ. 1 ಮತ್ತು ಜು. 1ರಂದು ಈ ಪರಿಷ್ಕರಣೆ ನಡೆಯುತ್ತದೆ. ಅದರಂತೆ ಜುಲೈಯಲ್ಲಿ ಕೇಂದ್ರ ಸರಕಾರವು ತುಟ್ಟಿಭತ್ತೆಯನ್ನು ಮತ್ತೆ ಶೇ. 4ರಷ್ಟು ಹೆಚ್ಚಿಸುವ ಸಾಧ್ಯತೆಯಿದೆ. ಕಳೆದ ಮಾರ್ಚ್‌ ತಿಂಗಳಲ್ಲಿ ತುಟ್ಟಿ ಭತ್ತೆ ಶೇ. 4ರಷ್ಟು ಏರಿಕೆ ಕಂಡಿತ್ತು.