ವಿದರ್ಭ ತಂಡಕ್ಕೆ ಚೊಚ್ಚಲ ರಣಜಿ ಟ್ರೋಫಿ; ದಿಲ್ಲಿಗೆ ಸೋಲು

ಇಂದೋರ್‌ : ಇಂದಿಲ್ಲಿ ಕೊನೆಗೊಂಡ ರಣಜಿ ಟ್ರೋಫಿ ಫೈನಲ್‌ ಪಂದ್ಯದಲ್ಲಿ ವಿದರ್ಭ ತಂಡ ದಿಲ್ಲಿ ತಂಡವನ್ನು 9 ವಿಕೆಟ್‌ಗಳಿಂದ ಸೋಲಿಸಿ ಚೊಚ್ಚಲ ರಣಜಿ ಟ್ರೋಫಿಯನ್ನು ಗೆದ್ದುಕೊಂಡಿತು.

ಇಲ್ಲಿನ ಹೋಳ್ಕರ್‌ ಸ್ಟೇಡಿಯಂನಲ್ಲಿ ತನ್ನ ಚೊಚ್ಚಲ ರಣಜಿ ಟ್ರೋಫಿಯನ್ನು ಗೆಲ್ಲಲು ವಿದರ್ಭಕ್ಕೆ ಕೇವಲ 29 ರನ್‌ಗಳ ಗುರಿ ನಿಗದಿಯಾಗಿತ್ತು. ಅದನ್ನು ವಿದರ್ಭ ತಂಡ ಕೇವಲ ಒಂದು ವಿಕೆಟ್‌ ನಷ್ಟದಲ್ಲಿ  (ತಂಡದ ನಾಯಕ ಫೈಜ್‌ ಫ‌ಜಲ್‌ ವಿಕೆಟ್‌) ಸಾಧಿಸಿ ದಿಲ್ಲಿ ತಂಡದೆದುರಿನ ತನ್ನ ಪ್ರಾಬಲ್ಯವನ್ನು ನಿಚ್ಚಳವಾಗಿ ಮೆರೆಯಿತು.

ಹೋಳ್ಕರ್‌ ಸ್ಟೇಡಿಯಂ  ನಿರಂತರ ಎರಡನೇ ರಣಜಿ ಫೈನಲ್‌ ಪಂದ್ಯವನ್ನು ಆಯೋಜಿಸಿರುವುದು ಗಮನಾರ್ಹವಾಗಿದೆ.

ಈ ಫೈನಲ್‌ ಪಂದ್ಯದಲ್ಲಿ ಟಾಸ್‌ ಗೆದ್ದು  ಫೀಲ್ಡಿಂಗ್‌ ಆಯ್ದುಕೊಂಡಿದ್ದ ವಿದರ್ಭ ತಂಡ ಬಲಿಷ್ಠ ದಿಲ್ಲಿಯನ್ನು  ಮೊದಲ ಇನ್ನಿಂಗ್ಸ್‌ನಲ್ಲಿ  295 ರನ್‌ಗಳಿಗೆ ಆಲೌಟ್‌ ಮಾಡಿತು. 

ಇದಕ್ಕೆ ದಿಟ್ಟ ಉತ್ತರ ಹೇಳಿದ ವಿದರ್ಭ ತಂಡ 547 ರನ್‌ಗಳ ಬೃಹತ್‌ ಮೊತ್ತವನ್ನು ಕಲೆ ಹಾಕಿ ಆಲೌಟಾಯಿತು. ಅಕ್ಷಯ್‌ ವಾಡ್‌ಕರ್‌ ಅವರು ತಮ್ಮ ಪ್ರಥಮ ದರ್ಜೆ ಕ್ರಿಕೆಟ್‌ನ ಚೊಚ್ಚಲ ಸೆಂಚುರಿ ಬಾರಿಸಿದರು.

ಎರಡನೇ ಇನ್ನಿಂಗ್ಸ್‌ನಲ್ಲಿ ದಿಲ್ಲಿ ಕೇವಲ 280 ರನ್‌ಗಳಿಗೆ ಆಲೌಟಾಯಿತು. ಹಾಗಾಗಿ ವಿದರ್ಭಕ್ಕೆ ಗೆಲ್ಲಲು ಕೇವಲ 29 ರನ್‌ಗಳ ಗುರಿ ನಿಗದಿಯಾಯಿತು. ಅದನ್ನು ಕೇವಲ 1 ವಿಕೆಟ್‌ ನಷ್ಟಕ್ಕೆ ಅದು ಸಾಧಿಸಿ ಚೊಚ್ಚಲ ರಣಜಿ ಟ್ರೋಫಿಯನ್ನು ಗೆದ್ದುಕೊಂಡಿತು.