ರೈಲಿನಲ್ಲಿ ಮತ್ತೆ ಸಿಗುತ್ತೆ ಆಹಾರ!

ಹೊಸದಿಲ್ಲಿ: ಕೊರೊನಾ ಸಾಂಕ್ರಾಮಿಕ ಹಿನ್ನೆಲೆಯಲ್ಲಿ ನಿಲ್ಲಿಸಲಾಗಿದ್ದ ರೈಲುಗಳಲ್ಲಿ ಆಹಾರ ವಿತರಣೆ ಸೌಕರ್ಯಕ್ಕೆ ಮರು ಚಾಲನೆ ನೀಡಲು ರೈಲ್ವೇ ಇಲಾಖೆ ನಿರ್ಧರಿಸಿದೆ.

ಈ ಹಿನ್ನೆಲೆಯಲ್ಲಿ ರೈಲುಗಳಲ್ಲಿ ಆಹಾರ ಸರಬರಾಜು ಮಾಡುವ ಹೊಣೆ ಹೊತ್ತಿರುವ ಭಾರತೀಯ ರೈಲ್ವೇ ಕೇಟರಿಂಗ್‌ ಹಾಗೂ ಟೂರಿಸಂ ಕಾರ್ಪೋರೇಷನ್‌ಗೆ (ಐಆರ್‌ಸಿಟಿಸಿ), ರೈಲ್ವೇ ಮಂಡಳಿ ಪತ್ರ ಬರೆದಿದೆ.

ಇತ್ತೀಚೆಗೆ ದೇಶೀಯ ವಿಮಾನ ಸೇವೆಗಳಲ್ಲೂ ಸಿದ್ಧ ಆಹಾರ ವಿತರಣೆ ಸೌಕರ್ಯವನ್ನು ಮರುಚಾಲನೆಗೊಳಿಸಲು ಆದೇಶಿಸಲಾಗಿದೆ. ಅದರ ಬೆನ್ನಲ್ಲೇ ರೈಲ್ವೇ ಕೂಡ ಅದೇ ನಿಟ್ಟಿನಲ್ಲಿ ಹೆಜ್ಜೆಯಿಟ್ಟಿದೆ.

ಭಾರತೀಯ ರೈಲ್ವೆ ಕೋವಿಡ್ ಸಂದರ್ಭದಲ್ಲಿ ರೈಲಿನಲ್ಲಿ ಆಹಾರ ಸರಬರಾಜು ಮಾಡುವುದನ್ನು ಸ್ಥಗಿತಗೊಳಿಸಿತ್ತು. ಈಗ ದೇಶದಲ್ಲಿ ಕೋವಿಡ್ ಪ್ರಕರಣ ಹತೋಟಿಗೆ ಬಂದಿದ್ದು, ಸೇವೆಯನ್ನು ಪುನಃ ಆರಂಭಿಸಲು ಇಲಾಖೆ ನಿರ್ಧರಿಸಿದೆ.