ಕಾಮನ್​ವೆಲ್ತ್​ 2022: ಬ್ಯಾಡ್ಮಿಂಟನ್‌ ಸ್ಪರ್ಧೆ; ಸಿಂಧು ಸೆಮಿಫೈನಲಿಗೆ

ಬರ್ಮಿಂಗ್‌ಹ್ಯಾಮ್‌: ಎರಡು ಬಾರಿಯ ಒಲಿಂಪಿಕ್‌ ಪದಕ ವಿಜೇತೆ ಪಿ.ವಿ. ಸಿಂಧು ಮಲೇಶ್ಯದ ಗೋ ವೈ ಜಿನ್‌ ಅವರನ್ನು ಮೂರು ಗೇಮ್‌ಗಳ ಸೆಣಸಾಟದಲ್ಲಿ ಸೋಲಿಸಿ ಬ್ಯಾಡ್ಮಿಂಟನ್‌ ಸ್ಪರ್ಧೆಯ ಸೆಮಿಫೈನಲ್‌ ಹಂತಕ್ಕೇರಿದ್ದಾರೆ.

ಮಾಜಿ ವಿಶ್ವ ಚಾಂಪಿಯನ್‌ ಸಿಂಧು 19-21, 21-14, 21-18 ಗೇಮ್‌ಗಳಿಂದ ಜಯ ಸಾಧಿಸಿ ವೈಯಕ್ತಿಕವಾಗಿ ಚೊಚ್ಚಲ ಚಿನ್ನ ಗೆಲ್ಲುವ ಸಾಧ್ಯತೆಯನ್ನು ಜೀವಂತವಿರಿಸಿಕೊಂಡರು. ಅವರು ಈ ಹಿಂದಿನ ಗೇಮ್ಸ್‌ನಲ್ಲಿ ಬೆಳ್ಳಿ ಮತ್ತು ಕಂಚು ಗೆದ್ದಿದ್ದರು. ಸಿಂಧು ಸತತ ಮೂರನೇ ಬಾರಿ ಗೇಮ್ಸ್‌ನ ಸೆಮಿಫೈನಲ್‌ ಹಂತಕ್ಕೇರಿದ ಸಾಧನೆ ಮಾಡಿದ್ದಾರೆ.

ಗೇಮ್ಸ್‌ಗೆ ಪದಾರ್ಪಣೆಗೈದ ಯುವ ತಾರೆ ಆಕರ್ಷಿ ಕಶ್ಯಪ್‌ ಅವರ ಹೋರಾಟ ಕ್ವಾರ್ಟರ್‌ ಫೈನಲ್‌ನಲ್ಲಿ ಅಂತ್ಯಗೊಂಡಿದೆ. ಅವರು ಸ್ಕಾಟ್ಲೆಂಡಿನ ಕ್ರಿಸ್ಟಿ ಗಿಲ್ಮೋರ್‌ ಕೈಯಲ್ಲಿ 10-21, 7-21 ಗೇಮ್‌ಗಳಿಂದ ಶರಣಾದರು. ಗಿಲ್ಮೋರ್‌ 2014 ಮತ್ತು 2018ರ ಗೇಮ್ಸ್‌ನಲ್ಲಿ ಅನುಕ್ರಮವಾಗಿ ಬೆಳ್ಳಿ, ಕಂಚು ಗೆದ್ದಿದ್ದರು.