ಬೆಳಗಾವಿ: ಬೈಲಹೊಂಗಲ ತಾಲೂಕಿನ ಹೊಗರ್ತಿ ಗ್ರಾಮದಲ್ಲಿ ಸಾರ್ವಜನಿಕ ಶ್ರೀ ಗಜಾನನ ಯುವಕ ಮಂಡಳ ಪ್ರತಿಷ್ಠಾಪಿಸಿದ್ದ ಗಣೇಶ ಮೂರ್ತಿ ಎದುರು ಇಟ್ಟಿದ್ದ ಪವರ್ ಸ್ಟಾರ್ ದಿ. ಪುನೀತ ರಾಜಕುಮಾರ ಅವರ ಭಾವಚಿತ್ರ 10,001 ರೂ.ಗೆ ಹರಾಜು ಆಗಿದೆ.
ಪ್ರತಿ ವರ್ಷ ಗಣೇಶ ಮೂರ್ತಿಯನ್ನು ಹೊಗರ್ತಿ ಗ್ರಾಮದಲ್ಲಿ ಪ್ರತಿಷ್ಠಾಪಿಸಲಾಗುತ್ತದೆ. ಅದರಂತೆ ಈ ಬಾರಿಯೂ ಗಣೇಶ ಮೂರ್ತಿ ಪ್ರತಿಷ್ಠಾಪಿಸಲಾಗಿತ್ತು. ಜತೆಗೆ ಮೂರ್ತಿ ಪಕ್ಕದಲ್ಲಿ ಪವರ್ ಸ್ಟಾರ್ ಪುನೀತ್ ರಾಜಕುಮಾರ ಭಾವಚಿತ್ರ ಇಡಲಾಗಿತ್ತು.
ಐದು ದಿನದ ಗಣೇಶ ಮೂರ್ತಿ ವಿಸರ್ಜನೆ ವೇಳೆ ಸವಾಲು ಕಾರ್ಯಕ್ರಮ ನಡೆಯಿತು. ಆಗ ಪುನೀತ್ ರಾಜಕುಮಾರ ಫೋಟೊ ಹರಾಜಿಗೆ ಹಾಕಲಾಯಿತು. ಈ ವೇಳೆ ಗ್ರಾಮದ ಬಸವರಾಜ ಕಲ್ಲಪ್ಪ ಹುಬ್ಬಳ್ಳಿ ಎಂಬವರು 10,001 ರೂ.ಗೆ ಅಪ್ಪು ಭಾವಚಿತ್ರ ಹರಾಜಿನಲ್ಲಿ ಪಡೆಯುವ ಮೂಲಕ ಪುನೀತರ ಬಗೆಗಿನ ಅಭಿಮಾನ ತೋರಿಸಿದರು.
ಸುತಗಟ್ಟಿ ಗ್ರಾಪಂ ಸದಸ್ಯ ಭೀಮಶಿ ಕಲ್ಲನಾಯ್ಕರ ಹಾಗೂ ಬಸವರಾಜ ಬಾಗಡಿ ಸವಾಲು ಕಾರ್ಯಕ್ರಮ ನಡೆಸಿಕೊಟ್ಟರು.
