Mangaluru: ಗ್ರಾಮ ಆಡಳಿತ ಅಧಿಕಾರಿಗಳ ಪ್ರತಿಭಟನೆ

ಮಂಗಳೂರು: ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ಗ್ರಾಮ ಆಡಳಿತ ಅಧಿಕಾರಿಗಳ ಸಂಘದ ದ.ಕ. ಜಿಲ್ಲಾ ಘಟಕದ ವತಿಯಿಂದ ನಗರದ ಮಿನಿ ವಿಧಾನ ಸೌಧದ ಬಳಿಕ ಸೋಮವಾರ ಪ್ರತಿಭಟನೆ ನಡೆಯಿತು.

ಕಂದಾಯ ಇಲಾಖೆಯಿಂದ ಅಭಿವೃದ್ಧಿಪಡಿಸಲಾದ ವಿವಿಧ ಮೊಬೈಲ್‌, ವೆಬ್‌ ತಂತ್ರಾಂಶ ಗಳ ಮೂಲಕ ಕರ್ತವ್ಯ ನಿರ್ವಹಿಸು ತ್ತಿರುವುದರಿಂದ ಹಾಗೂ ಸಿ ವೃಂದದ ನೌಕರರ 10 ಪಟ್ಟು ಹೆಚ್ಚು ಜವಾಬ್ದಾರಿ ನಿರ್ವಹಿಸುತ್ತಿರುವುದರಿಂದ ಗ್ರಾಮ ಆಡಳಿತ ಅಧಿಕಾರಿಗಳ ಹುದ್ದೆಯನ್ನು ತಾಂತ್ರಿಕ ಹುದ್ದೆಗಳಿಗೆ ನೀಡುವ ವೇತನ ಶ್ರೇಣಿ ನಿಗದಿಪಡಿಸಿ ಆದೇಶ ನೀಡುವಂತೆ ಆಗ್ರಹಿಸಿದರು.

ಕೆಲಸದ ಅವಧಿಯ ಬಳಿಕ ನಡೆಸುವ ಎಲ್ಲ ವರ್ಚುವಲ್‌ ಸಭೆಗಳನ್ನು ನಿಷೇಧಿಸಬೇಕು. ಪ್ರಯಾಣ ಭತ್ತೆಯನ್ನು 500 ರೂ.ಗಳಿಂದ 3 ಸಾವಿರ ರೂ.ಗಳಿಗೆ ಏರಿಸಬೇಕು. ಗ್ರಾಮ ಆಡಳಿತ ಅಧಿಕಾರಿಗಳ ಜಾಬ್‌ ಚಾರ್ಟ್‌ ನಿಗದಿಪಡಿಸಬೇಕು. ಕಂದಾಯ ಇಲಾಖೆಯ ಮೂರು ವರ್ಷಗಳ ಸೇವೆಯನ್ನು ಪರಿಗಣಿಸಿ ಅಂತರ್‌ ಜಿಲ್ಲಾ ವರ್ಗಾವಣೆಗಾಗಿ ಕಂದಾಯ ಇಲಾಖೆಯಲ್ಲಿ ಹೊಸ ಮಾರ್ಗಸೂಚಿಯನ್ನು ರಚಿಸಬೇಕು. ಜತೆಗೆ ಗ್ರಾಮ ಆಡಳಿತ ಅಧಿಕಾರಿಗಳಿಗೆ ಸುಸಜ್ಜಿತ ಕಚೇರಿ, ಗುಣಮಟ್ಟದ ಟೇಬಲ್‌, ಕುರ್ಚಿ, ಆಲ್ಮೇರಾ, ಪ್ರಿಂಟರ್‌-ಸ್ಕ್ಯಾನರ್  ವ್ಯವಸ್ಥೆಗಳನ್ನು ಕಲ್ಪಿಸಬೇಕು ಎಂದು ಪ್ರತಿಭಟನಕಾರರು ಆಗ್ರಹಿಸಿದರು.

ಸಂಘದ ಜಿಲ್ಲಾಧ್ಯಕ್ಷ ಸಂತೋಷ್‌ ಕೆ., ಪ್ರಧಾನ ಕಾರ್ಯದರ್ಶಿ ಅನಿಲ್‌ ಕೆ.ಪೂಜಾರಿ, ಪ್ರದೀಪ್‌ ಕುಮಾರ್‌ ಕೆ., ಗೌರವಾಧ್ಯಕ್ಷ ಉಮೇಶ್‌ ಕಾವಡಿ, ಪ್ರಮುಖರಾದ ಪ್ರದೀಪ್‌ ಶೆಣೈ, ಶೇಷಾದ್ರಿ, ಅವಿನಾಶ್‌ ಬಿಲ್ಲವ, ಧರ್ಮ ಸಾಮ್ರಾಜ್ಯ, ಸುಜಾತಾ, ತಿಪ್ಪೇಶ್‌, ಚಂದ್ರ ಕುಮಾರ್‌ ಕೆ.ಎನ್‌., ಆಶ್ರಿತಾ ಮೊದಲಾದವರಿದ್ದರು.