Pakistan ಪ್ರೇರಿತ ಸಂಘಟನೆ ಪರ ಕಾರ್ಯಾಚರಣೆ: ಎನ್‌ಐಎ ದಾಳಿ

ಹೊಸದಿಲ್ಲಿ: ಪಾಕಿಸ್ಥಾನದ ಉಗ್ರ ಸಂಘಟನೆ ಘಜ್ವಾ- ಎ-ಹಿಂದ್‌ ಜಾಲಕ್ಕೆ ಸಂಬಂಧಿಸಿದಂತೆ ದೇಶದ ಹಲವೆಡೆ ಎನ್‌ಎಐ ದಾಳಿ ನಡೆಸಿದೆ. ಕೇರಳದ ಕಲ್ಲಿಕೋಟೆ, ಉತ್ತರ ಪ್ರದೇಶದ ಆಜಮ್‌ಗಢ, ಗುಜರಾತ್‌ನ ಗಿರ್‌ಸೋಮನಾಥ ಜಿಲ್ಲೆ, ಮಧ್ಯಪ್ರದೇಶದ ದೇವಾಸ್‌ ಜಿಲ್ಲೆಗಳಲ್ಲಿ ಶೋಧ ಕಾರ್ಯಾಚರಣೆ ನಡೆಸಲಾಗಿದೆ ಎಂದು ಹೊಸದಿಲ್ಲಿಯಲ್ಲಿ ಎನ್‌ಐಎ ಅಧಿಕಾರಿಗಳು ತಿಳಿಸಿದ್ದಾರೆ.

ಪಾಕಿಸ್ಥಾನದಲ್ಲಿ ಇರುವ ಹ್ಯಾಂಡ್ಲರ್‌ಗಳ ಮೂಲಕ ದೇಶದಲ್ಲಿ ಘಜ್ವಾ- ಎ-ಹಿಂದ್‌ಗೆ ಸೇರಿದವರು ಭಾರತ ವಿರೋಧಿ ಪ್ರಚಾರ, ದ್ವೇಷ ಸೃಷ್ಟಿಸುವಂಥ ಸಂಗತಿಗಳಲ್ಲಿ ನಿರತರಾಗಿರುತ್ತಿದ್ದರು. ಶೋಧ ಕಾರ್ಯಾಚರಣೆ ವೇಳೆ ಹಲವು ದಾಖಲೆಗಳು, ಡಿಜಿಟಲ್‌ ಡಿವೈಸ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಸಂಘಟನೆಯ ವಿರುದ್ಧ ಬಿಹಾರದಲ್ಲಿ ಕಳೆದ ವರ್ಷ ಕೇಸು ದಾಖಲಿಸಲಾಗಿತ್ತು.

ಬಂಧನ: ಇದೇ ವೇಳೆ, ಅನ್ಸಾರ್‌ ಗುಜ್ವಾತ್‌-ಉಲ್‌-ಹಿಂದ್‌ ಎಂಬ ಉಗ್ರ ಸಂಘಟನೆಯ ವ್ಯಕ್ತಿಯನ್ನು ಜಮ್ಮು ಮತ್ತು ಕಾಶ್ಮೀರದ ಶೋಪಿಯಾನ್‌ನಲ್ಲಿ ವ್ಯಕ್ತಿಯನ್ನು ಬಂಧಿಸಲಾಗಿದೆ. ಆತನ ಬಳಿಯಿಂದ ಶಸ್ತ್ರಾಸ್ತ್ರಗಳು ಮತ್ತು ಮದ್ದುಗುಂಡುಗಳನ್ನು ವಶಪಡಿಸಿಕೊಳ್ಳಲಾಗಿದೆ.