Advertisement

ಪ್ರೊ ಕಬಡ್ಡಿ ಸೀಸನ್‌-9 ಆರಂಭ; ಬೆಂಗಳೂರು ಬುಲ್ಸ್‌ , ದಬಾಂಗ್‌ ಡೆಲ್ಲಿ ಗೆಲುವಿನ ಆರಂಭ

11:16 PM Oct 07, 2022 | Team Udayavani |

ಬೆಂಗಳೂರು: ಪ್ರೊ ಕಬಡ್ಡಿ ಸೀಸನ್‌-9ರ ಮೊದಲೆರಡು ಪಂದ್ಯಗಳಲ್ಲಿ ಹಾಲಿ ಚಾಂಪಿಯನ್‌ ದಬಾಂಗ್‌ ಡೆಲ್ಲಿ ಮತ್ತು ಆತಿಥೇಯ ಬೆಂಗಳೂರು ಬುಲ್ಸ್‌ ಗೆಲುವು ಸಾಧಿಸಿವೆ. ಆರಂಭಿಕ ಪಂದ್ಯದಲ್ಲಿ ಡೆಲ್ಲಿ 41-27ರಿಂದ ಯು ಮುಂಬಾವನ್ನು, ಬಳಿಕ ಬುಲ್ಸ್‌ 34-29ರಿಂದ ತೆಲುಗು ಟೈಟಾನ್ಸ್‌ಗೆ ಸೋಲುಣಿಸಿತು.

Advertisement

ಬೆಂಗಳೂರು-ಟೈಟಾನ್ಸ್‌ ಪಂದ್ಯ ಜಿದ್ದಾಜಿದ್ದಿಯಿಂದ ಕೂಡಿತ್ತು. ಡಿಫೆನ್ಸ್‌ನಲ್ಲಿ ಅಮೋಘ ನಿರ್ವಹಣೆ ತೋರುವ ಮೂಲಕ ಬುಲ್ಸ್‌ ಗೆಲುವು ಕಂಡಿತು. ಆರಂಭದಲ್ಲಿ ಹಿನ್ನಡೆಯಲ್ಲಿದ್ದ ಬುಲ್ಸ್‌ಗೆ ವಿಕಾಸ್‌ ಖಂಡೋಲ ಲೀಡ್‌ ತಂದುಕೊಡುವಲ್ಲಿ ಯಶಸ್ವಿಯಾದರು. ವಿರಾಮದ ವೇಳೆ ಪಂದ್ಯ 17-17 ಸಮಬಲದಲ್ಲಿತ್ತು.

ರೈಡರ್‌ ನೀರಜ್‌ ನರ್ವಾಲ್‌ ಅತ್ಯಧಿಕ 7 ಅಂಕ, ವಿಕಾಸ್‌ ಖಂಡೋಲ 5 ಅಂಕ, ಡಿಫೆಂಡರ್‌ಗಳಾದ ಮಹೇಂದರ್‌ ಸಿಂಗ್‌ ಮತ್ತು ಸೌರಭ್‌ ನಂದಲ್‌ ತಲಾ 4 ಅಂಕ ಗಳಿಸಿದರು.

ತೆಲುಗು ಟೈಟಾನ್ಸ್‌ ಪರ ರೈಡರ್‌ ವಿನಯ್‌ 7 ಅಂಕ, ಸಿದ್ಧಾರ್ಥ್ ದೇಸಾಯಿ 4 ಅಂಕ ತಂದಿತ್ತರು.

ಮುಂಬಾ ಮೇಲೆ ನವೀನ್‌ ರೈಡ್‌
ಕೂಟದ ಉದ್ಘಾಟನ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ದಬಾಂಗ್‌ ಡೆಲ್ಲಿ ಗೆಲುವಿನ ಆರಂಭ ಪಡೆಯಿತು. ಅದು ಯು ಮುಂಬಾವನ್ನು 41-27 ಅಂಕಗಳಿಂದ ಮಣಿಸಿತು.

Advertisement

ನವೀನ್‌ ಕುಮಾರ್‌ ನೇತೃತ್ವದ ಡೆಲ್ಲಿ ಆರಂಭದಿಂದಲೇ ಮುಂಬಾ ಮೇಲೆ ಸವಾರಿ ಮಾಡತೊಡಗಿತು. ಸ್ವತಃ ನವೀನ್‌ ಕುಮಾರ್‌ ಮುಂಚೂಣಿಯಲ್ಲಿ ಕಾಣಿಸಿಕೊಂಡರು. ಇನ್ನೊಂದೆಡೆ ಮುಂಬಾಗೆ ಫ‌ಜಲ್‌ ಅಟ್ರಾಚಲಿ ಅವರ ಅನುಪಸ್ಥಿತಿ ಭಾರೀ ಹಿನ್ನಡೆಯಾಗಿ ಪರಿಣಮಿಸಿತು. ವಿರಾಮದ ವೇಳೆ ಡೆಲ್ಲಿ 19-10 ಅಂತರದ ಮುನ್ನಡೆಯೊಂದಿಗೆ ಸಂಪೂರ್ಣ ಹಿಡಿತ ಸಾಧಿಸಿತು.

ದ್ವಿತೀಯಾರ್ಧದಲ್ಲೂ ಡೆಲ್ಲಿ ಇದೇ ಲಯದಲ್ಲಿ ಸಾಗಿತು. ಸರಾಸರಿ 10 ಅಂಕಗಳ ಮುನ್ನಡೆಯನ್ನು ಕಾಯ್ದು ಕೊಂಡೇ ಬಂದಿತು. ಸೂಪರ್‌ ರೈಡರ್‌ ನವೀನ್‌ ಪ್ರೊ ಕಬಡ್ಡಿಯ 43ನೇ “ಸೂಪರ್‌ ಟೆನ್‌’ನೊಂದಿಗೆ ಗಮನ ಸೆಳೆದರು. ಈ ಪಂದ್ಯದಲ್ಲಿ ಅವರು ತಂದುಕೊಟ್ಟ ಅಂಕ 13. ಇದರಲ್ಲಿ 11 ಟಚ್‌ ಪಾಯಿಂಟ್‌, 2 ಬೋನಸ್‌ ಪಾಯಿಂಟ್‌ ಸೇರಿತ್ತು.

ಮತ್ತೋರ್ವ ರೈಡರ್‌ ಆಶು ಮಲಿಕ್‌ ಉತ್ತಮ ಪ್ರದರ್ಶನ ನೀಡಿ 7 ಅಂಕ ಗಳಿಸಿದರು. ಡಿಫೆಂಡರ್‌ಗಳಾದ ಸಂದೀಪ್‌ ಧುಲ್‌, ಕೃಶನ್‌, ವಿಶಾಲ್‌ ತಲಾ 4 ಅಂಕ ಸಂಪಾದಿಸಿದರು.

ಮುಂಬಾ ಪರ ಮಿಂಚಿದವರೆಂದರೆ ರೈಡರ್‌ ಆಶಿಷ್‌ (7 ಅಂಕ), ಗುಮಾನ್‌ ಸಿಂಗ್‌ (4 ಅಂಕ) ಮಾತ್ರ. ಡಿಫೆಂಡರ್‌ ರಿಂಕು ಗಳಿಸಿದ್ದು 3 ಅಂಕ ಮಾತ್ರ.

ಪ್ರೊಪೋಸಲ್‏ಗೆ ನಿರೀಕ್ಷಿಸುತ್ತಿದ್ದೀರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

Advertisement

Udayavani is now on Telegram. Click here to join our channel and stay updated with the latest news.

Next