“ಅಶಿಸ್ತಿನ ಕಾರಣ’ನಿರಾಕರಿಸಿದ ಶಾ

ಹೊಸದಿಲ್ಲಿ: ಭಾರತ ಟೆಸ್ಟ್‌ ತಂಡದ ಆರಂಭಿಕ ಬ್ಯಾಟ್ಸ್‌ಮನ್‌ ಪೃಥ್ವಿ ಶಾ, ಕಿರಿಯ ವಯಸ್ಸಿನಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟನ್ನು ಅದ್ಧೂರಿಯಾಗಿ ಆರಂಭಿಸಿದ್ದರು. ಆದರೆ ಕಳೆದ ವರ್ಷ ಆಸ್ಟ್ರೇಲಿಯಕ್ಕೆ ತೆರಳಿದ್ದ ಅವರು ಸರಣಿಗೂ ಮೊದಲೇ ಗಾಯಾಳಾಗಿ ಭಾರತಕ್ಕೆ ಮರಳಬೇಕಾಯಿತು. ಹಿಮ್ಮಡಿ ನೋವಿನ ಕಾರಣಕ್ಕೆ ಪೃಥ್ವಿ ಶಾ ವಾಪಸಾಗಿದ್ದಾರೆ ಎಂದು ಬಿಸಿಸಿಐ ಹೇಳಿತ್ತು. ಆದರೆ ಅವರು ತಂಡದಿಂದ ಹೊರಬೀಳಲು ಗಾಯವಲ್ಲ, ಅಶಿಸ್ತೇ ಕಾರಣ ಎನ್ನುವ ಸುದ್ದಿ ಕೂಡ ಇತ್ತೀಚೆಗೆ ಹಬ್ಬಿತ್ತು. ಇದಕ್ಕೆ ಹೊಸದಿಲ್ಲಿಯಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಉತ್ತರಿಸಿದ ಅವರು, “ಇವೆಲ್ಲ ವದಂತಿಗಳಷ್ಟೇ. ಇದಕ್ಕೆಲ್ಲ ಉತ್ತರಿಸದೆ ಉಳಿಯುವುದೇ ಒಳಿತು’ ಎಂದಿದ್ದಾರೆ.

“ನನಗೆ ಹಿಮ್ಮಡಿ ಗಾಯವಾಗಿತ್ತು. ಅದು ಗುಣವಾಗುವುದು ಬಹಳ ತಡವಾಯಿತು. ಆದ್ದರಿಂದ ಹಿಂತಿರುಗಿ ಮರಳ ಬೇಕಾಯಿತು ಅಷ್ಟೇ. ನನಗೆ ಭಾರತ ತಂಡದಲ್ಲಿ ಯಾವುದೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ ನೀಡಿದರೂ ಆಡಲು ಸಿದ್ಧನಿದ್ದೇನೆ. ಆರಂಭಕಾರನ ಸ್ಥಾನವೇ ಬೇಕೆಂದಿಲ್ಲ’ ಎಂದಿದ್ದಾರೆ ಶಾ. ಡೆಲ್ಲಿ ಕ್ಯಾಪಿಟಲ್ಸ್‌ ನಡೆಸಿದ ಮುಕ್ತ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಪೃಥ್ವಿ ಶಾ, ತಾನು ಚೇತರಿಕೆಗೆ ಶ್ರದ್ಧೆಯಿಂದ ಪ್ರಯತ್ನಿಸುತ್ತಿಲ್ಲ ಎಂಬ ಆರೋಪಗಳಿಗೂ ಉತ್ತರಿಸಿದರು.