ಪವರ್‌: ಮಹಿಳಾ ದಿನಾಚರಣೆ, ಪದಗ್ರಹಣ

ಉಡುಪಿ: ಮಣಿಪಾಲದ “ಪವರ್‌’, ಇನ್ನರ್‌ವೀಲ್‌ ಮತ್ತು ಮಣಿಪಾಲ ಮಹಿಳಾ ಸಮಾಜದ ಸಹಭಾಗಿತ್ವದಲ್ಲಿ ಮಾ. 7ರಂದು ಕಿದಿಯೂರು ಹೊಟೇಲಿನ ಶೇಷಶಯನ ಸಭಾಂಗಣದಲ್ಲಿ ಮಹಿಳಾ ದಿನಾಚರಣೆ ಜರಗಿತು.

ಉಡುಪಿ ಜಿಲ್ಲಾ ಮಹಿಳಾ ಕಾಂಗ್ರೆಸ್‌ ಅಧ್ಯಕ್ಷೆ ವೆರೋನಿಕಾ ಕರ್ನೇಲಿಯೋ ಸಮಾರಂಭವನ್ನು ಉದ್ಘಾಟಿಸಿದರು.
ಇದೇ ಸಂದರ್ಭದಲ್ಲಿ ಮುಂದಿನ ಎರಡು ವರ್ಷಗಳ ಅವಧಿಗೆ ಪವರ್‌ನ ನೂತನ ಪದಾಧಿಕಾರಿಗಳ ಪದಗ್ರಹಣ ಸಮಾರಂಭವೂ ಜರಗಿತು.  ಡಾ| ಗಾಯತ್ರಿ ಅಧ್ಯಕ್ಷರಾಗಿ, ತಾರಾ ತಿಮ್ಮಯ್ಯ ಉಪಾಧ್ಯಕ್ಷರಾಗಿ, ಡಾ| ಸ್ಮಿತಾ ರಜನೀಶ್‌ ಕಾರ್ಯದರ್ಶಿಯಾಗಿ, ರಶ್ಮೀ ವಿಜಯ್‌ ಜತೆ ಕಾರ್ಯದರ್ಶಿಯಾಗಿ ಹಾಗೂ ದೀನಾ ಪ್ರಭಾಕರ್‌ ಕೋಶಾಧಿಕಾರಿಗಳಾಗಿ ಅಧಿಕಾರ ಸ್ವೀಕರಿಸಿದರು.

ಪವರ್‌ ಮಾಜಿ ಅಧ್ಯಕ್ಷೆ ಸಾಧನಾ ಮಲ್ಯ ಅತಿಥಿಗಳನ್ನು ಪರಿಚಯಿಸಿದರು.  ಕಾರ್ಯದರ್ಶಿ ಶ್ರುತಿ ಶೆಣೈ ಸಂಸ್ಥೆಯ ಬಗ್ಗೆ ಮಾಹಿತಿ ನೀಡಿದರು. 
ಮಾಜಿ ಅಧ್ಯಕ್ಷೆ ದಿವ್ಯರಾಣಿ ಶುಭಾ ಶಂಸನೆಗೈದರು. ಸ್ಥಾಪಕಾಧ್ಯಕ್ಷೆ ರೇಣು ಜಯರಾಮ್‌ ನೂತನ ಪದಾಧಿ ಕಾರಿಗಳನ್ನು ಪರಿಚಯಿಸಿದರು. 

ನೂತನ ಅಧ್ಯಕ್ಷರಾದ ಡಾ| ಗಾಯತ್ರಿ ಅಧಿಕಾರ ಸ್ವೀಕಾರ ಭಾಷಣ ಮಾಡಿದರು. ಕಾರ್ಯದರ್ಶಿ ಡಾ| ಸ್ಮಿತಾ ರಜನೀಶ್‌ ಹೊಸ ಸಂಪುಟವನ್ನು ಪರಿಚಯಿಸಿದರು. ಮಣಿಪಾಲ ಮಹಿಳಾ ಸಮಾಜದ ಅಧ್ಯಕ್ಷೆ ಅರುಣಾ ಶೆಣೈ ಕಾರ್ಯದರ್ಶಿ ಸರೋಜಾ ಆಚಾರ್ಯ, ಇನ್ನರ್‌ ವೀಲ್‌ ಕ್ಲಬ್‌ನ ಅಧ್ಯಕ್ಷೆ ಸರಸ್ವತಿ ಕಾಮತ್‌, ಕಾರ್ಯದರ್ಶಿ ಸಪ್ನಾ ಸುರೇಶ್‌ ಉಪಸ್ಥಿತರಿದ್ದರು.

ಪವರ್‌ ಅಧ್ಯಕ್ಷೆ ಸರಿತಾ ಸಂತೋಷ್‌ ಸ್ವಾಗತಿಸಿ, ಕೋಶಾಧಿಕಾರಿ ನಿವೇದಿತಾ ಶೆಟ್ಟಿ ವಂದಿಸಿದರು. ಮಂಜರಿಚಂದ್ರ ಕಾರ್ಯಕ್ರಮ ನಿರೂಪಿಸಿದರು.