ಬಿಎಸ್‌ವೈ ರಾಜಕಾರಣಕ್ಕೆ ಅಂಟಿದ ವಿಷ: ಕಾಗೋಡು

ತೀರ್ಥಹಳ್ಳಿ: ಈ ಉಪ ಚುನಾವಣೆ ಯಾರಿಗೂ ಬೇಡವಾಗಿತ್ತು. ಆದರೆ, ಬಿಜೆಪಿಯ ಅಪ್ಪ-ಮಗನಿಂದಾಗಿ ಈ ಚುನಾವಣೆ ಬರುವಂತಾಗಿದೆ. ರಾಜಕಾರಣಕ್ಕೆ ವಿಷವಾಗಿರುವ ಈ ಅಪ್ಪ-ಮಗನಿಗೆ ಈ ಬಾರಿ ಸರಿಯಾದ ಪಾಠ ಕಲಿಸಬೇಕಿದೆ ಎಂದು ಮಾಜಿ ಸಚಿವ ಕಾಗೋಡು ತಿಮ್ಮಪ್ಪ ಹೇಳಿದರು. 

ಕಾಂಗ್ರೆಸ್‌ ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅವರು, ಯಡಿಯೂರಪ್ಪ ಹಾಗೂ ಬಿ.ವೈ.ರಾಘವೇಂದ್ರ ವಿರುದ್ಧ ಕಿಡಿಕಾರಿದರು. ಮತದಾರ ಈ ಪ್ರಜಾಪ್ರಭುತ್ವ ವ್ಯವಸ್ಥೆಯ ಮಾಲೀಕನಿದ್ದಂತೆ. ಈ ಚುನಾವಣೆ ಯಾರಿಗೂ ಬೇಕಾಗಿರಲಿಲ್ಲ. ಆದರೆ, ಅಪ್ಪ-ಮಕ್ಕಳ ಭ್ರಷ್ಟ ಹಣದಿಂದ ಚುನಾವಣೆ ಬರುವಂತಾಗಿದೆ. ಯಡಿಯೂರಪ್ಪ ಚುನಾವಣೆಯನ್ನು ಸಂತೆಯ ಸಾಮಾನೆಂದು ಭಾವಿಸಿದ್ದಾರೆ.

ರಾಜಕಾರಣವನ್ನು ವ್ಯಾಪಾರೀಕರಣ ಮಾಡಲು ಹೊರಟಿರುವ ಯಡಿಯೂರಪ್ಪ, ಹಿಂದೆ ಸಂಸದರಾಗಿದ್ದಾಗ ಈ ಕ್ಷೇತ್ರಕ್ಕೆ ಏನು ಮಾಡಿದ್ದರು. ನಂತರ ಸಂಸದರಾದ ಅವರ ಮಗ ರಾಘವೇಂದ್ರ ಕ್ಷೇತ್ರಕ್ಕೆ ಮಾಡಿದ್ದಾದರೂ ಏನು ಎಂಬುದನ್ನೆಲ್ಲ ಜನ ಅರಿಯಬೇಕಿದೆ ಎಂದರು. ಜಿಲ್ಲೆಯ ಜನತೆ ಈ ಚುನಾವಣೆಯನ್ನು ಸವಾಲಾಗಿ ಸ್ವೀಕರಿಸಿ, ಯಡಿಯೂರಪ್ಪ ಮತ್ತು ರಾಘವೇಂದ್ರನನ್ನು ಬುಡಸಮೇತ ಕಿತ್ತು, ರಾಜಕಾರಣಕ್ಕೆ ಅಂಟಿದ ವಿಷವನ್ನು ತೆಗೆಯಬೇಕು ಎಂದು ಆಕ್ರೋಶ ವ್ಯಕ್ತಪಡಿಸಿದರು.