ಶಿಂಜೋ ಅಬೆ ಅಂತ್ಯಕ್ರಿಯೆ: ಟೋಕ್ಯೋಗೆ ತೆರಳಿದ ಪ್ರಧಾನಿ ಮೋದಿ

ನವದೆಹಲಿ: ಜಪಾನ್‌ನ ಮಾಜಿ ಪ್ರಧಾನಿ ಶಿಂಜೋ ಅಬೆ ಅವರ ಅಂತ್ಯಕ್ರಿಯೆ ಮಂಗಳವಾರ ಟೋಕ್ಯೋದಲ್ಲಿ ನಡೆಯಲಿದ್ದು, ಪ್ರಧಾನಿ ನರೇಂದ್ರ ಮೋದಿ ಭಾಗವಹಿಸಲಿದ್ದಾರೆ. 217 ದೇಶಗಳ ಅಧ್ಯಕ್ಷರು, ಪ್ರಧಾನಮಂತ್ರಿಗಳು ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಲಿದ್ದಾರೆ.

ಟೋಕ್ಯೋಗೆ ತೆರಳುವ ಬಗ್ಗೆ ಪ್ರಧಾನಿ ಖುದ್ದು ಟ್ವೀಟ್‌ ಮಾಡಿದ್ದಾರೆ. ಶಿಂಜೋ ಅಬೆ ನಿಧನದಿಂದ ಭಾರತದ ಜನರು ದುಃಖತಪ್ತರಾಗಿದ್ದಾರೆ. ದೇಶದ ಜನರ ಸಂತಾಪವನ್ನು ಜಪಾನ್‌ ಪ್ರಧಾನಿ ಪ್ಯೂಮಿಯೋ ಕಿಶಿದಾ ಮತ್ತು ಅಬೆ ಅವರ ಪತ್ನಿಗೆ ತಿಳಿಯಪಡಿಸಲಿದ್ದೇನೆ’ ಎಂದು ಟ್ವೀಟ್‌ ಮಾಡಿದ್ದಾರೆ.

ಅಬೆ ಮತ್ತು ಪ್ರಧಾನಿ ಮೋದಿಯವರು ಎರಡೂ ದೇಶಗಳ ನಡುವಿನ ಬಾಂಧವ್ಯವನ್ನು ಗಟ್ಟಿಗೊಳಿಸುವಲ್ಲಿ ಮಹತ್ವದ ಕೊಡುಗೆ ನೀಡಿದ್ದಾರೆ ಎಂದು ವಿದೇಶಾಂಗ ಕಾರ್ಯದರ್ಶಿ ವಿನಯ ಕ್ವಾಟ್ರಾ ಹೇಳಿದ್ದಾರೆ.

ಜು. 8ರಂದು ಶಿಂಬೋ ಅಬೆ ಅವರು ಚುನಾವಣಾ ಪ್ರಚಾರದಲ್ಲಿ ನಿರತರಾಗಿದ್ದ ವೇಳೆ, ಯುವಕನೊಬ್ಬ ಗುಂಡು ಹಾರಿಸಿ ಅವರನ್ನು ಹತ್ಯೆ ಮಾಡಿದ್ದ.