ದಿಗಂತ್‌ ನಾಯಕರಾಗಿರುವ “ಹುಟ್ಟುಹಬ್ಬದ ಶುಭಾಶಯಗಳು’ ಚಿತ್ರ ಡಿ.31ರಂದು ಬಿಡುಗಡೆಯಾಗುತ್ತಿದೆ. ಈಗಾಗಲೇ ಟೀಸರ್‌ ಮೂಲಕ ಕುತೂಹಲ ಹುಟ್ಟಿಸಿರುವ ಈ ಚಿತ್ರದ ಪಾರ್ಟಿ ಸಾಂಗ್‌ವೊಂದು ಶುಕ್ರವಾರ ಬಿಡುಗಡೆಯಾಗಿದೆ.
ಈ ಹಾಡು ಡ್ಯಾನ್ಸ್‌ ನಂಬರ್‌ ಆಗಿದ್ದು, ನ್ಯೂ ಇಯರ್‌ ಪಾರ್ಟಿ ಮಾಡುವವರಿಗೆ ಈ ಹಾಡು ಸಖತ್‌ ಕಿಕ್‌ ನೀಡಲಿದೆ. ಯೋಗರಾಜ್‌ ಭಟ್‌ ಬರೆದಿರುವ “ಎಣ್ಣೆ ಹೊಡೆದರೆ ಅಪರಾಧ.. ಹೋದ ಹುಡುಗಿಯೂ ಬರಬಹುದು…’ ಎಂಬ ಈ ಹಾಡು ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗುತ್ತದೆ ಎಂಬ ನಂಬಿಕೆ ಚಿತ್ರತಂಡಕ್ಕಿದೆ.
ಇದನ್ನೂ ಓದಿ:ಎಮೋಶನ್‌ ಇಲ್ಲದೆ ನನಗೆ ಸಿನಿಮಾ ಮಾಡಲು ಬರುವುದಿಲ್ಲ: ರಾಜಮೌಳಿ
ನಾಗರಾಜ್‌ ಬೇತೂರು ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಈ ಹಾಡಿನ ಬಗ್ಗೆ ಮಾತನಾಡುವ ಅವರು, “ಚಿತ್ರಕ್ಕೆ ಬೇಕಾದ ಪಾರ್ಟಿ ಸಾಂಗ್‌ ವೊಂದನ್ನು ಯಾರಿಂದ ಬರೆಸೋದು ಎಂದು ನಾವು ಯೋಚಿಸುತ್ತಿದ್ದಾಗ ನಮಗೆ ತಲೆಗೆ ಬಂದಿದ್ದು ಯೋಗರಾಜ್‌ ಭಟ್‌ ಹೆಸರು. ಆದರೆ, ಅವರು ಆಗ “ಗಾಳಿಪಟ-2′ ಚಿತ್ರದ ಚಿತ್ರೀಕರಣದಲ್ಲಿ ಬಿಝಿಯಾಗಿದ್ದರು. ಕೊನೆಗೆ ನಟ ದಿಗಂತ್‌ ಅವರೇ ಭಟ್ಟರಿಗೆ ಹೇಳಿ, ಅವರಿಂದ ಬರೆಸಿದ್ದಾರೆ. ಹಾಡು ತುಂಬಾ ಚೆನ್ನಾಗಿ ಮೂಡಿಬಂದಿದೆ’ ಎನ್ನುತ್ತಾರೆ.
ಇನ್ನು, ಚಿತ್ರ ಕಾಮಿಡಿ ಥ್ರಿಲ್ಲರ್‌ ಜಾನರ್‌ಗೆ ಸೇರಿದ್ದು, ಸ್ನೇಹಿತರ ಗೆಟ್‌ ಟುಗೆದರ್‌ ವೊಂದರಲ್ಲಿ ನಡೆಯುವ ಘಟನೆ ಮೂಲಕ ಸಿನಿಮಾ ಸಾಗುತ್ತದೆ. ಒಂದು ರಾತ್ರಿಯಲ್ಲಿ ನಡೆಯುವ ಕಥೆ ಇದಾಗಿದ್ದು, ಪ್ರೇಕ್ಷಕರಿಗೆ ಮಜ ಸಿಗಲಿದೆ’ ಎನ್ನುತ್ತಾರೆ.
ಕ್ರಿಸ್ಟಲ್‌ ಪಾರ್ಕ್‌ ಸಿನಿಮಾಸ್‌ನಡಿ ಟಿ.ಆರ್‌. ಚಂದ್ರಶೇಖರ್‌ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಚಿತ್ರದಲ್ಲಿ ದಿಗಂತ್‌, ಕವಿತಾ ಗೌಡ, ಚೇತನ್‌ ಗಂಧರ್ವ ಸೇರಿದಂತೆ ಅನೇಕರು ನಟಿಸಿದ್ದಾರೆ.
