ಇಂದಿನಿಂದ ಸಂಸತ್‌ ಅಧಿವೇಶನ ಪುನರಾರಂಭ

ಹೊಸದಿಲ್ಲಿ: ಸಂಸತ್‌ನ ಬಜೆಟ್‌ ಅಧಿವೇಶನದ ಮುಂದುವರಿದ ಭಾಗ ಸೋಮವಾರದಿಂದ ಆರಂಭವಾಗಲಿದೆ. ಆಡಳಿತಾರೂಢ ಬಿಜೆಪಿ ಈಶಾನ್ಯದ 3 ರಾಜ್ಯಗಳ ಚುನಾವಣಾ ಫ‌ಲಿತಾಂಶದಿಂದ ಹುರುಪುಗೊಂಡಿದೆ. ಹೀಗಾಗಿ, ಕಾಂಗ್ರೆಸ್‌ ನೇತೃತ್ವದ ವಿಪಕ್ಷಗಳು ಪ್ರಸ್ತಾವಿಸಲಿರುವ ಪಿಎನ್‌ಬಿ ಹಗರಣ ಮತ್ತಿತರ ವಿಚಾರಗಳನ್ನು ಸಮರ್ಥವಾಗಿಯೇ ಎದುರಿಸಲು ಸರಕಾರ ಮುಂದಾಗಿದೆ.

ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಆಡಳಿತ ಮತ್ತು ಪ್ರತಿಪಕ್ಷಗಳ ನಡುವೆ ಕೋಲಾಹಲ ನಡೆಯುವುದು ಖಚಿತ. ಚುನಾವಣೆಯಲ್ಲಿ ಗೆದ್ದಿರುವ ಹುಮ್ಮಸ್ಸಿನಲ್ಲಿರುವ ಬಿಜೆಪಿ, ಕಾಂಗ್ರೆಸ್‌ ನೇತೃತ್ವದ ಸರಕಾರದ ಅವಧಿಯಲ್ಲಿನ ಹಗರಣಗಳ ಬಗ್ಗೆ ಪ್ರಬಲವಾಗಿಯೇ ಪ್ರಸ್ತಾವಿಸಲು ಮುಂದಾಗಿದೆ.

ಇದೇ ಅವಧಿಯಲ್ಲಿ ಉದ್ದೇಶಪೂರ್ವಕ ಆರ್ಥಿಕ ಅವ್ಯವಹಾರ ಮಸೂದೆಯನ್ನು ಸಂಸತ್‌ನಲ್ಲಿ ಮಂಡಿಸಿ ಅನುಮೋದನೆ ಪಡೆದುಕೊಳ್ಳುವುದೂ ಸರಕಾರದ ಇರಾದೆಯಾಗಿದೆ. ಕೆಲವೇ ದಿನಗಳ ಹಿಂದೆ ಕೇಂದ್ರ ಸಂಪುಟದಲ್ಲಿ ಅದಕ್ಕೆ ಅನುಮೋದನೆ ಸಿಕ್ಕಿತ್ತು. ಇದರ ಜತೆಗೆ ತ್ರಿವಳಿ ತಲಾಖ್‌, ಒಬಿಸಿ ಮಸೂದೆಯನ್ನು ಅಂಗೀಕರಿಸುವುದೂ ಸರಕಾರದ ಆದ್ಯತೆಯಾಗಿದೆ.