Paris Masters: ರೋಹನ್‌ ಬೋಪಣ್ಣ – ಮ್ಯಾಥ್ಯೂ ಎಬ್ಡೆನ್ ಕ್ವಾರ್ಟರ್‌ಗೆ

ಪ್ಯಾರಿಸ್‌: ಭಾರತದ ಖ್ಯಾತ ಟೆನಿಸ್‌ ತಾರೆ ರೋಹನ್‌ ಬೋಪಣ್ಣ ಮತ್ತು ಅವರ ಆಸ್ಟ್ರೇಲಿಯಾದ ಜತೆಗಾರ ಮ್ಯಾಥ್ಯೂ ಎಬ್ಡೆನ್ ಅವರು ಸುಲಭ ಗೆಲುವಿನೊಂದಿಗೆ ಪ್ಯಾರಿಸ್‌ ಮಾಸ್ಟರ್ ಟೆನಿಸ್‌ ಕೂಟದ ಡಬಲ್ಸ್‌ನಲ್ಲಿ ಕ್ವಾರ್ಟರ್‌ಫೈನಲ್‌ ಹಂತಕ್ಕೇರಿದ್ದಾರೆ.

ಎಟಿಪಿ 1000 ಕೂಟದ ಈ ಪಂದ್ಯದಲ್ಲಿ ಬೋಪಣ್ಣ- ಎಬ್ಡೆನ್ ಅವರು ಮಾರ್ಸೆಲೊ ಮೆಲೊ ಮತ್ತು ಅಲೆಕ್ಸಾಂಡರ್‌ ಜ್ವರೇವ್‌ ಅವರನ್ನು 6-4, 7-6 ಸೆಟ್‌ಗಳಿಂದ ಉರುಳಿಸಿದರು.

ಬೋಪಣ್ಣ-ಎಬ್ಡೆನ್ ಅವರ ಮೊದಲ ಸರ್ವ್‌ನಲ್ಲಿ ಪ್ರಾಬಲ್ಯ ಸ್ಥಾಪಿಸಿ ಪಂದ್ಯ ತಮ್ಮದಾಗಿಸಿಕೊಂಡರು. ಒಂದು ತಾಸು ಮತ್ತು 16 ನಿಮಿಷಗಳ ಈ ಹೋರಾಟದಲ್ಲಿ ಅವರು ನಾಲ್ಕು ಏಸ್‌ ಸಿಡಿಸಿದ್ದರು. ಬೋಪಣ್ಣ ಮತ್ತು ಎಬ್ಡೆನ್ ಈ ಮೊದಲು ವರ್ಷಾಂತ್ಯದ ಎಟಿಪಿ ಫೈನಲ್‌ನಲ್ಲಿ ಆಡುವ ಅವಕಾಶ ಪಡೆದಿದ್ದರು.