ಬಲು ಅಪರೂಪದ ಅವಳಿ ಶ್ರೀತಾಳೆ ಮರ ಪತ್ತೆ

ಹಿರಿಯಡಕ: ಹಿರಿಯಡಕ ವ್ಯಾಪ್ತಿಯ ಅಂಜಾರಿನ ಅರಣ್ಯ ಪ್ರದೇಶದಲ್ಲಿ ಅವಳಿ ಶ್ರೀತಾಳೆಮರ ಪತ್ತೆಯಾಗಿದೆ. ವಿಶ್ವದಲ್ಲಿಯೇ ಶ್ರೀತಾಳೆ ಮರ ಅವನತಿ ಅಂಚಿನಲ್ಲಿದೆ. ಇಂತಹ ಶ್ರೀತಾಳೆಮರ ಆತ್ರಾಡಿ ಬಳಿ ಹೂಬಿಟ್ಟ ಸಂದರ್ಭದಲ್ಲಿ ಗೋಚರವಾಗಿದ್ದು, ಹೆಚ್ಚಿನವರು ತಾಳಿಬೊಂಡ ಮರ ಎಂದು ತಿಳಿದುಕೊಂಡಿದ್ದರು. ಆದರೆ ಈ ಶ್ರೀತಾಳೆ ಮರವು ವಿಭಿನ್ನವಾಗಿದೆ.

ಹಚ್ಚಹಸುರು ಇರುವ ಎಲೆಗಳ ಮೂಲಕ ಈ ಮರದ ಕುರುಹು ಪತ್ತೆ ಹಚ್ಚಬಹುದು. ಈ ಮರ ದೊಡ್ಡದಾಗಿ ಬೆಳೆಯುವ ಹಂತದಲ್ಲಿ ಗುರುತು ಮಾಡಬಹುದು.

ಇಂತಹ ಮರಗಳನ್ನು ರಕ್ಷಿಸಲು ಶ್ರೀಗಂಧದ ಮರಕ್ಕೆ ಸರಕಾರ ಭದ್ರತೆ ಒದಗಿಸಿದಂತೆ ಇದಕ್ಕೂ ಒದಗಿಸಬೇಕು. ಈ ಮರ 60-70 ವರ್ಷ ಬೆಳೆದು ಹೂ ಬಿಟ್ಟು ಕಾಯಿಯಾಗಿ ಸಾಯುತ್ತದೆ. ಹೂ ಬಿಡುವ ಸಂದರ್ಭದಲ್ಲಿ ಇದನ್ನು ಕಡಿಯುತ್ತಿರುವುದು ಕಂಡುಬರುತ್ತಿದೆ. ಇದನ್ನು ತಪ್ಪಿಸುವ ನಿಟ್ಟಿನಲ್ಲಿ ಸರಕಾರದ ಮಟ್ಟದಲ್ಲಿ ಕಾರ್ಯಗಳಾಗಬೇಕು ಎಂದು ಪರಿಸರಪ್ರೇಮಿಗಳು ಅಭಿಪ್ರಾಯಪಟ್ಟಿದ್ದಾರೆ.