ಸುಳ್ಳು ವೀಡಿಯೋ ಟ್ವೀಟ್‌ ಮಾಡಿದ ಪಾಕ್‌ ಸೇನೆ ವಕ್ತಾರ

ಇಸ್ಲಾಮಾಬಾದ್‌: ಬಾಲಕೋಟ್‌ ದಾಳಿ ವೀಡಿಯೋ ಎಂಬುದಾಗಿ ಇನ್ಯಾವುದೋ ವೀಡಿಯೋವನ್ನು ಟ್ವಿಟರ್‌ನಲ್ಲಿ ಹಂಚಿಕೊಳ್ಳುವ ಮೂಲಕ ಪಾಕಿಸ್ಥಾನದ ಸೇನಾ ವಕ್ತಾರ ಆಸಿಫ್ ಗಫ‌ೂರ್‌ ಸುಳ್ಳು ಸುದ್ದಿ ಹರಡಿದ ಪ್ರಸಂಗ ನಡೆದಿದೆ. ವಾಯು ಪಡೆಯ ನಿವೃತ್ತ ಏರ್‌ ಮಾರ್ಷಲ್‌ ಡೆಂಜಿಲ್‌ ಕೀಲೊರ್‌ ಅವರ ವಿಡಿಯೋವನ್ನು ಆಸಿಫ್ ಗಫ‌ೂರ್‌ ಟ್ವೀಟ್‌ ಮಾಡಿದ್ದು, ಇದು ಫೆಬ್ರವರಿ 27 ರಂದು ಭಾರತವು ಪಾಕಿಸ್ಥಾನದ ಮೇಲೆ ದಾಳಿ ನಡೆಸುವ ವಿಫ‌ಲ ಯತ್ನ ಎಂಬುದಾಗಿ ಹೇಳಿಕೊಂಡಿದ್ದರು.

ಆದರೆ ಇದು 2015ರಲ್ಲೇ ರೆಕಾರ್ಡ್‌ ಆಗಿರುವ ವೀಡಿಯೋ ಎಂಬುದನ್ನು ನೆಟ್ಟಿಗರು ಕಂಡುಕೊಂಡಿದ್ದಾರೆ. ಅಷ್ಟೇ ಅಲ್ಲ, ಇದು 1965ರ ಯುದ್ಧದ ಬಗ್ಗೆ ಕೀಲೊರ್‌ ಮಾತನಾಡಿದ ವೀಡಿಯೋ ಎಂದೂ ನಂತರ ತಿಳಿದುಬಂದಿದೆ. ಆದರೆ ಗಫ‌ೂರ್‌ ತಮ್ಮ ಟ್ವಿಟರ್‌ನಲ್ಲಿ ಪ್ರಕಟಿಸಿದ ವೀಡಿಯೋದಲ್ಲಿ ಅಭಿನಂದನ್‌ ವರ್ಧಮಾನ್‌ ವಿಡಿಯೋವನ್ನೂ ಸೇರಿಸಲಾಗಿದ್ದು, ಮೂಲ ವೀಡಿಯೋವನ್ನು ಎಡಿಟ್‌ ಮಾಡಿರುವುದು ಸ್ಪಷ್ಟವಾಗಿದೆ.