ಬೆಂಕಿ ಹತ್ತಿಕೊಂಡ ರೈಲನ್ನು ತಳ್ಳಿದ ಪ್ರಯಾಣಿಕರು

ಮೇರಠ್ : ದಿಲ್ಲಿ-ಸಹರಾನ್ಪುರ ರೈಲು ಶನಿವಾರ ಉತ್ತರಪ್ರದೇಶ ರಾಜ್ಯದ ಮೇರಠ್ ನ ದೌರಾಲ ನಿಲ್ದಾಣದಲ್ಲಿ ನಿಂತಿದ್ದಾಗ ವಿಚಿತ್ರ ಘಟನೆಯೊಂದು ನಡೆದಿದೆ.

ಹಲವು ವರ್ಷಗಳ ಹಿಂದೆ ಬಸ್‌ಗಳು ಕೆಟ್ಟು ನಿಂತಿದ್ದಾಗ ತಳ್ಳುವ ದೃಶ್ಯಗಳು ಸಾಮಾನ್ಯವಾಗಿದ್ದವು. ಶನಿವಾರ ರೈಲನ್ನೇ ಪ್ರಯಾಣಿಕರು ತಳ್ಳಿದ್ದಾರೆ!

ದೌರಾಲ ನಿಲ್ದಾಣದಲ್ಲಿ ನಿಂತಿದ್ದಾಗ ಎಂಜಿನ್‌ ಮತ್ತು ಎರಡು ಬೋಗಿಗಳಿಗೆ ಬೆಂಕಿ ತಗಲಿಕೊಂಡಿದೆ. ಕೂಡಲೇ ಕೆಳಕ್ಕಿಳಿದ ಪ್ರಯಾಣಿಕರು ಬೆಂಕಿ ಹತ್ತಿಕೊಂಡ ರೈಲಿನ ಭಾಗವನ್ನು ಬೇರ್ಪಡಿಸಲು, ಉಳಿದ ಬೋಗಿಗಳನ್ನು ತಳ್ಳಿದ್ದಾರೆ. ಅದಾದ ಮೇಲೆ ಅಗ್ನಿಶಾಮಕ ಸಿಬಂದಿ ಬಂದು ಬೆಂಕಿ ಆರಿಸಿದ್ದಾರೆ. ಯಾವುದೇ ಅಪಾಯ ಸಂಭವಿಸಿಲ್ಲ. ಬೆಂಕಿ ಹತ್ತಿಕೊಂಡದ್ದು ಹೇಗೆ ಎಂದು ತಿಳಿದಿಲ್ಲ.