ಅಮೃತಸರ ಗ್ರೆನೇಡ್‌ ದಾಳಿ: ಓರ್ವ ಸೆರೆ, ಇನ್ನೋರ್ವನಿಗಾಗಿ ಶೋಧ: ಸಿಎಂ

ಚಂಡೀಗಢ : ಅಮೃತಸರ ಗ್ರೆನೇಡ್‌ ದಾಳಿಗೆ ಸಂಬಂಧಿಸಿ ಒಬ್ಬ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿರುವುದಾಗಿ ಮುಖ್ಯಮಂತ್ರಿ ಅಮರೀಂದರ್‌ ಸಿಂಗ್‌ ಇಂದು ಬುಧವಾರ ತಿಳಿಸಿದ್ದಾರೆ.

ನಿರಂಕಾರಿ ಪಂಗಡದವರ ಧಾರ್ಮಿಕ ಸಮಾವೇಶವನ್ನು ಗುರಿ ಇರಿಸಿ ಕಳೆದ ಭಾನುವಾರ ಅಮೃತಸರ ಸಮೀಪ ರಾಜಾಸಾನ್ಸಿಯಲ್ಲಿ ನಡೆದಿದ್ದ ಗ್ರೆನೇಡ್‌ ದಾಳಿಗೆ ಮೂವರು ಬಲಿಯಾಗಿ ಇಪ್ಪತ್ತಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದರು.

ಬಂಧಿತ ವ್ಯಕ್ತಿಯನ್ನು ಬಿಕ್ರಮ್‌ಜಿತ್‌ ಸಿಂಗ್‌ ಎಂದು ಗುರುತಿಸಲಾಗಿದೆ; ಅವತಾರ್‌ ಸಿಂಗ್‌ ಎಂಬ ಇನ್ನೋರ್ವ ಆರೋಪಿಗಾಗಿ ಶೋಧ ಕಾರ್ಯಾಚರಣೆ ನಡೆದಿದೆ ಎಂದು ಅಮರೀಂದರ್‌ ಅವರು ಸುದ್ದಿಗಾರರಿಗೆ ತಿಳಿಸಿದರು. 

ಇಬ್ಬರೂ ಆರೋಪಿಗಳ ಫೋಟೋವನ್ನು ಮಾಧ್ಯಮದವರಿಗೆ ತೋರಿಸಿದ ಮುಖ್ಯಮಂತ್ರಿ, ಶೀಘ್ರವೇ ಎರಡನೇ ಆರೋಪಿಯನ್ನು ಸೆರೆ ಹಿಡಿಯಲಾಗುವುದು ಎಂದು ಹೇಳಿದರು. 

ಪಾಕಿಸ್ಥಾನದ ಐಎಸ್‌ಐ ಪಂಜಾಬ್‌ನಲ್ಲಿ ಅಶಾಂತಿಯನ್ನು ಹುಟ್ಟು ಹಾಕಲು ಕ್ರಿಯಾಶೀಲವಾಗಿದೆ ಎಂದ ಅಮರೀಂದರ್‌, ಅಮೃತಸರ ದಾಳಿಯು ಸಂಪೂರ್ಣವಾಗಿ ಭಯೋತ್ಪಾದನೆ ಕೃತ್ಯವಾಗಿದೆ ಎಂದು ಹೇಳಿದರು.