ಆಮ್ನಿ ಪಲ್ಟಿ: ತಾಯಿ, ಮಗ ಸಾವು

ಕುಂಬಳೆ: ಪುತ್ತಿಗೆ ಬಳಿಯ ಬಾಡೂರು ಓಣಿಬಾಗಿಲು ಎಂಬಲ್ಲಿ ಆಮ್ನಿ ಕಾರು ರಸ್ತೆ ತಿರುವಿನಲ್ಲಿ ಪಕ್ಕದ ಹೊಂಡಕ್ಕೆ ಬಿದ್ದು ತಾಯಿ ಮತ್ತು ಮಗ ಸ್ಥಳದಲ್ಲೇ ಸಾವಿಗೀಡಾಗಿ, ಮೂವರು ಗಂಭೀರವಾಗಿ ಗಾಯಗೊಂಡ ಘಟನೆ ಗುರುವಾರ ಮಧ್ಯಾಹ್ನ ಸಂಭವಿಸಿದೆ.

ಮೂಲತಃ ಅಡ್ಕಸ್ಥಳದವರಾಗಿದ್ದು, ಪ್ರಸ್ತುತ ಪೆರ್ಲದ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದ ಮಹ ಮ್ಮದ್‌ ಅವರ ಪುತ್ರ ಅಬ್ದುಲ್‌ ಶರೀಫ್‌ (39) ಹಾಗೂ ಇವರ ತಾಯಿ ಬಿ ಫಾತಿಮಾ(60) ಮೃತಪಟ್ಟವರು. ಅಬ್ದುಲ್‌ ಶರೀಫ್‌ ಅವರ ಪತ್ನಿ ಖೈರುನ್ನೀಸಾ (28) ಪುತ್ರಿಯರಾದ ಶಮ್ನಾ (10) ಮತ್ತು ಶಹರ್‌ ಬಾನ್‌(6) ಅವರು ಗಂಭೀರವಾಗಿ ಗಾಯಗೊಂಡಿದ್ದು, ಅವರನ್ನು ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಅಬ್ದುಲ್‌ ಶರೀಫ್‌ ಅವರು ಮುಂಬಯಿಯಲ್ಲಿ ಹೊಟೇಲ್‌ನಲ್ಲಿ ದುಡಿಯುತ್ತಿದ್ದರು. ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಊರಿಗೆ ಬಂದಿದ್ದು, ಶುಕ್ರವಾರ ಮತ್ತೆ ಮುಂಬಯಿಗೆ ತೆರಳುವವರಿದ್ದರು.

ಮುಗು ರೋಡ್‌ನ‌ ಉರ್ಮಿಯಲ್ಲಿರುವ ಪತ್ನಿ ಸಹೋದರ ರಫೀಕ್‌ ಅವರ ಮಗುವನ್ನು ತೊಟ್ಟಿಲಿಗೆ ಹಾಕುವ ಸಮಾರಂಭದಲ್ಲಿ ಭಾಗವಹಿಸಲು ರುತ್ತಿದ್ದಾಗ ದುರಂತ ಸಂಭವಿಸಿದೆ. ಕಾಸರಗೋಡಿನಿಂದ ಅಗ್ನಿಶಾಮಕ ಸಿಬಂದಿ ಆಗಮಿಸಿ ಕಾರ್ಯಾಚರಣೆ ನಡೆಸಿದ್ದು, ಬದಿಯಡ್ಕ ಪೊಲೀಸರು ಪ್ರಕರಣ ದಾಖಲಿಸಿ ಕೊಂಡಿದ್ದಾರೆ.