ಒಲಿಂಪಿಯನ್‌ ಮಹಿಳಾ ಸೈಕ್ಲಿಸ್ಟ್‌ ಆತ್ಮಹತ್ಯೆ

ನ್ಯೂಯಾರ್ಕ್‌:  ರಿಯೋ ಒಲಿಂಪಿಕ್ಸ್‌ ಸೈಕ್ಲಿಂಗ್‌ ಮಹಿಳಾ ತಂಡ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದ ಅಮೆರಿಕದ ಸ್ಪರ್ಧಿ ಕೆಲ್ಲಿ ಕ್ಯಾಟ್ಲಿನ್‌ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಈ ಆಘಾತಕಾರಿ ವಿಷಯವನ್ನು ಅವರ ಕುಟುಂಬ ಮೂಲಗಳು ಖಚಿತಪಡಿಸಿವೆ.

ಕೆಲ್ಲಿಗೆ 23 ವರ್ಷವಾಗಿತ್ತು. ಕಳೆದ ವರ್ಷ ಸೈಕ್ಲಿಂಗ್‌ ಅವಘಡವೊಂದರಲ್ಲಿ ಕಾಲಿನ ಗಾಯಕ್ಕೆ ಒಳಗಾಗಿದ್ದರು. ಈ ಘಟನೆಯ ಬಳಿಕ ಕೆಲ್ಲಿ ತೀವ್ರ ಮಾನಸಿಕ ಖನ್ನತೆಯಿಂದ ಬಳಲುತ್ತಿದ್ದರು ಎನ್ನಲಾಗಿದೆ. ಕಳೆದ ಜನವರಿಯಲ್ಲಿ ಒಂದು ಸಲ ಆತ್ಮಹತ್ಯೆಗೂ ಪ್ರಯತ್ನ ಪಟ್ಟಿದ್ದರು. ಆಗ ಅವರನ್ನು ಬಚಾವ್‌ ಮಾಡಲಾಗಿತ್ತು. ಇದೀಗ ಸ್ಟಾನ್‌ಫೋರ್ಡ್‌ ವಿಶ್ವವಿದ್ಯಾನಿಲಯ ಕ್ಯಾಂಪಸ್‌ನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ತಿಳಿದು ಬಂದಿದೆ.

ಕ್ಯಾಟಿನ್‌ ಸತತ 3 ಬಾರಿ ವಿಶ್ವ ಚಾಂಪಿಯನ್‌ ಸೈಕ್ಲಿಂಗ್‌ ಪ್ರಶಸ್ತಿ ಗೆದ್ದಿದ್ದರು. ಮಾತ್ರವಲ್ಲ ಪ್ರೊ ಸೈಕ್ಲಿಂಗ್‌ ತಂಡವನ್ನೂ ಪ್ರತಿನಿಧಿಸಿದ್ದರು. ಅವರು ಸ್ಟಾನ್‌ಫೋರ್ಡ್‌ ವಿಶ್ವವಿದ್ಯಾನಿಲಯದಲ್ಲಿ ಕಾಂಪ್ಯೂಟೇಶನಲ್‌ ಮ್ಯಾಥಮ್ಯಾಟಿಕ್ಸ್‌ ವಿಷಯದಲ್ಲಿ ಪದವಿ ಪಡೆದಿದ್ದಾರೆ.