ಅಭಿನಂದನ್‌ ವಿಡಿಯೋ ಅಳಿಸಲು ಸೂಚನೆ

ಪಾಕಿಸ್ಥಾನದಲ್ಲಿ ಸಿಲುಕಿಕೊಂಡಿರುವ ವಿಂಗ್‌ ಕಮಾಂಡರ್‌ ಅಭಿನಂದನ್‌ ವರ್ಧಮಾನ್‌ ಅವರ ವಿಡಿಯೋಗಳನ್ನು ತೆಗೆದು ಹಾಕುವಂತೆ ಯೂಟ್ಯೂಬ್‌ಗ ಭಾರತದ ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಸೂಚನೆ ನೀಡಿದೆ. 

11 ವಿಡಿಯೋ ಲಿಂಕ್‌ಗಳನ್ನು ಯೂಟ್ಯೂಬ್‌ಗ ನೀಡಲಾಗಿದೆ. ಪಾಕಿಸ್ಥಾನದ ಸೇನೆಗೆ ಸಿಕ್ಕಿಕೊಂಡ ವೇಳೆ ಹಾಗೂ ಅನಂತರದಲ್ಲಿ ಮೂರು ವಿಡಿಯೋಗಳನ್ನು ಚಿತ್ರೀಕರಿಸಲಾಗಿದ್ದು, ಇದು ಯೂಟ್ಯೂಬ್‌ ಮೂಲಕ ಸಾಮಾ ಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. 

ಯೂಟ್ಯೂಬ್‌ನ ಮೂಲಕ ಟ್ವಿಟರ್‌, ಫೇಸ್‌ಬುಕ್‌ ಹಾಗೂ ವಾಟ್ಸ್‌ಆ್ಯಪ್‌ನಲ್ಲಿ ಕೋಟ್ಯಂತರ ಜನರು ಈ ವಿಡಿಯೋಗಳನ್ನು ಹಂಚಿಕೊಂಡಿದ್ದಾರೆ ಹಾಗೂ ವೀಕ್ಷಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿದ ಯೂಟ್ಯೂಬ್‌ ಮಾತೃಸಂಸ್ಥೆ ಗೂಗಲ್‌, ಸರಕಾರದ ವಿನಂತಿಗಳಿಗೆ ನಾವು ಕಾಲಕಾಲಕ್ಕೆ ಪ್ರತಿಕ್ರಿಯಿಸುತ್ತಿದ್ದೇವೆ. ಕಾನೂನು ರೀತ್ಯಾ ಸೂಕ್ತವಲ್ಲದ ವಿಡಿಯೋಗಳನ್ನು ಅಳಿಸುವುದಕ್ಕೆ ಸಂಬಂಧಿಸಿದಂತೆ ಸರಕಾರದ ವಿನಂತಿಗಳನ್ನು ನಾವು ಜಾರಿಗೊಳಿಸುತ್ತಿದ್ದೇವೆ ಎಂದು ಗೂಗಲ್‌ ವಕ್ತಾರರು ಪ್ರತಿಕ್ರಿಯಿಸಿದ್ದಾರೆ.