ಸ್ವಂತ ಮನೆಯಲ್ಲೇ ಯುವತಿಯಿಂದ ಕಳವು

ಬೆಂಗಳೂರು: ಪ್ರಿಯಕರನ ಜತೆ ಐಷಾರಾಮಿ ಜೀವನ ನಡೆಸಲು ಸ್ವಂತ ಮನೆಯಲ್ಲಿಯೇ ಕಳ್ಳತನ ಮಾಡಿದ ಮಹಿಳೆ ಹಾಗೂ ಆಕೆಯ ಪ್ರಿಯಕರ ಅಮೃತಹಳ್ಳಿ ಪೊಲೀಸರ ಬಲೆಗೆ ಬಿದ್ದಿದ್ದಾರೆ.

ಜಕ್ಕೂರು ಲೇಔಟ್‌ ನಿವಾಸಿ ದೀಪ್ತಿ (24) ಮತ್ತು ಆಕೆಯ ಪ್ರಿಯಕರ ಅಮೃತಹಳ್ಳಿಯ ಓಲ್ಡ್‌ ಪೊಲೀಸ್‌ ಬಿಲ್ಡಿಂಗ್‌ ನಿವಾಸಿ ಸಿ.ಎನ್‌.ಮದನ್‌(27) ಬಂಧಿತರು. ಅವರಿಂದ 36 ಲಕ್ಷ ರೂ. ಮೌಲ್ಯದ 725 ಗ್ರಾಂ ಚಿನ್ನಾಭರಣ, 6 ಲಕ್ಷ ರೂ. ಮೌಲ್ಯದ ಮೂರು ಕಾರುಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ಹೇಳಿದರು.

ದೀಪ್ತಿಗೆ ಈಗಾಗಲೇ ಮದುವೆಯಾಗಿದ್ದು, ಪತಿಯಿಂದ ದೂರವಾಗಿ ತಾಯಿ ಜತೆ ಇದ್ದರು. ಈ ಮಧ್ಯೆ ಜೆರಾಕ್ಸ್‌ ಅಂಗಡಿ ನಡೆಸುತ್ತಿದ್ದ ಮದನ್‌ ಪರಿಚಯವಾಗಿ ಸಂಬಂಧದಲ್ಲಿದ್ದರು. ತಾಯಿ ಮನೆಯಿಂದ ಹೊರ ಹೋಗಿದ್ದಾಗ ದೀಪ್ತಿ ಪ್ರಿಯಕರನ ಜತೆಗೂಡಿ ಚಿನ್ನಾಭರಣ ಕಳವುಗೈದಿದ್ದಳು.