H-1B ವೀಸಾ ನೋಂದಣಿಗೆ ಇನ್ನು ಹೊಸ ಕ್ರಮ ಜಾರಿ?

ವಾಷಿಂಗ್ಟನ್‌: ಅಮೆರಿಕದ ಮಾಹಿತಿ ತಂತ್ರಜ್ಞಾನ ಕಂಪನಿಗಳಲ್ಲಿ ಉದ್ಯೋಗ ಪಡೆಯಲು ಇರುವ ಎಚ್‌-1ಬಿ ವೀಸಾ ನೋಂದಣಿಗೆ ಇರುವ ವ್ಯವಸ್ಥೆ ಆಧುನೀಕರಣಗೊಳಿಸಲು ಚಿಂತನೆ ನಡೆಸಲಾಗಿದೆ. ಸದ್ಯ ಇರುವ ಕಂಪ್ಯೂಟರೀಕೃತ ವ್ಯವಸ್ಥೆಯಲ್ಲಿ ಕೆಲವೊಂದು ಲೋಪ-ದೋಷಗಳು ಪತ್ತೆಯಾಗಿರುವ ಹಿನ್ನೆಲೆಯಲ್ಲಿ ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವೆಗಳ ಇಲಾಖೆ (ಯುಎಸ್‌ಸಿಐಎಸ್‌) ಈ ನಿರ್ಧಾರ ಕೈಗೊಂಡಿದೆ. 2023 ಮತ್ತು 2024ನೇ ಸಾಲಿನ ವಿತ್ತೀಯ ವರ್ಷದಲ್ಲಿ ಎಚ್‌1ಬಿ ವೀಸಾ ನೀಡುವ ಸಂದರ್ಭದಲ್ಲಿ ಕೆಲವೊಂದು ವಂಚನೆಯ ಪ್ರಕರಣಗಳು ಬಹಿರಂಗವಾಗಿದೆ. ಅಂಥವುಗಳನ್ನು ಪತ್ತೆ ಹಚ್ಚಿ ಆ ಅರ್ಜಿಗಳಿಗೆ ನಿಷೇಧ ಹೇರಲಾಗಿದೆ ಎಂದು ಶುಕ್ರವಾರ ಬಿಡುಗಡೆ ಮಾಡಲಾಗಿರುವ ವಾರ್ಷಿಕ ವರದಿಯಲ್ಲಿ ಉಲ್ಲೇಖೀಸಲಾಗಿದೆ.

ಕೆಲವೊಂದು ಸಣ್ಣ ಕಂಪನಿಗಳು ಪದೇ ಪದೆ ಒಂದೇ ಹೆಸರುಗಳನ್ನು ಅರ್ಜಿಗಳನ್ನು ಹಾಕಿರುತ್ತವೆ. ಹೀಗಾಗಿ, ಲಾಟರಿ ಪ್ರಕ್ರಿಯೆಯಲ್ಲಿ ಹಲವು ಬಾರಿ ಅವುಗಳು ಆಯ್ಕೆಯಾಗುತ್ತವೆ. ಈ ಮೂಲಕ ಕೃತಕವಾಗಿ ವೀಸಾ ಪಡೆಯಲು ಬೇಕಾಗುವ ಅರ್ಹತೆಯನ್ನು ಹೆಚ್ಚಿಸಿಕೊಳ್ಳುತ್ತಿರುವುದು ಬೆಳಕಿಗೆ ಬಂದಿದೆ. ಪ್ರಸಕ್ತ ವರ್ಷ 7,80,884 ಅರ್ಜಿಗಳು ಸಲ್ಲಿಕೆಯಾಗಿದ್ದವು. 2023ರಲ್ಲಿ 4,83,927, 2022ರಲ್ಲಿ 3,01,447, 2021ರಲ್ಲಿ 2,74,237 ಅರ್ಜಿಗಳು ಸಲ್ಲಿಕೆಯಾಗಿದ್ದವು.