ಹ್ಯಾಂಗೋವರ್‌ನಲ್ಲಿ ನೀತು! 

ಕನ್ನಡದಲ್ಲಿ ನಾಯಕಿಯರು ಸ್ಪೆಷಲ್‌ ಸಾಂಗು, ಐಟಂ ಸಾಂಗ್‌ಗಳಿಗೆ ಹೆಜ್ಜೆ ಹಾಕುವುದು ಹೊಸದೇನಲ್ಲ. ಈಗಾಗಲೇ ಅನೇಕ ನಟಿಯರು ಅಂತಹ ಅದೆಷ್ಟೋ ಹಾಡುಗಳಿಗೆ ತಮ್ಮ ಸೊಂಟ ಬಳುಕಿಸಿರುವುದುಂಟು. ಈಗ ನೀತು ಕೂಡ ಚಿತ್ರವೊಂದರ ಸ್ಪೆಷಲ್‌ ಸಾಂಗ್‌ಗೆ ಹೆಜ್ಜೆ ಹಾಕಿದ್ದಾರೆ. ಹಾಗಂತ ನೀತು ಅವರಿಗೆ ಅದು ಹೊಸದೇನೂ ಅಲ್ಲ ಬಿಡಿ. ಈಗಾಗಲೇ ಒಂದಷ್ಟು ಚಿತ್ರಗಳಲ್ಲಿ ಕುಣಿದು ಕುಪ್ಪಳಿಸಿದ್ದಾರೆ.

ಇತ್ತೀಚೆಗೆ “ಹ್ಯಾಂಗೋವರ್‌’ ಚಿತ್ರದ ಪಬ್‌ ಸಾಂಗ್‌ಗೆ ನೀತು ಕುಣಿದಿದ್ದಾರೆ. ವಿಠಲ್‌ ಭಟ್‌ ನಿರ್ದೇಶನದ “ಹ್ಯಾಂಗೋವರ್‌’ ಚಿತ್ರವನ್ನು ರಾಕೇಶ್‌ ನಿರ್ಮಿಸಿದ್ದಾರೆ. ಈ ಚಿತ್ರದಲ್ಲಿ ಒಂದು ಪಬ್‌ ಸಾಂಗ್‌ ಇದ್ದುದರಿಂದ ಅದನ್ನು ನೀತು ಅವರಿಂದ ಮಾಡಿಸಬೇಕು ಅಂತ ನಿರ್ಧರಿಸಿದ ಚಿತ್ರತಂಡ, ಮೈಸೂರಿನ ಫ‌ನ್‌ ಫೋರ್ಟ್‌ನಲ್ಲಿ ಹಾಕಿದ್ದ ವಿಶೇಷ ಪಬ್‌ಸೆಟ್‌ನಲ್ಲಿ ನೀತು ಅವರಿಂದ ಹೆಜ್ಜೆ ಹಾಕಿಸಿದೆ.

ವೀರ್‌ಸಮರ್ಥ್ ಸಂಗೀತ ಸಂಯೋಜನೆಯಲ್ಲಿ ಮೂಡಿಬಂದ “ನಾನೇ ರುಕ್ಕು, ಕೊಡ್ತೀನಿ ಒಂದು ಲುಕ್ಕು, ನಾನಂದ್ರೆ ಫ‌ುಲ್ಲು ಕಿಕ್ಕು, ಎಂಜಾಯಿ ಮಾಡಿ, ಯಾರು ಇಲ್ಲಿ ಅಂಜೋದು ಬೇಡ, ಆಸೆ ಅದುಮೋದು ಬೇಡ, ಅಂದ ಅನುಭವಿಸಿ ನೋಡಿ …’ ಎಂಬ ಹಾಡಿಗೆ ಪಡ್ಡೆಗಳಿಗೂ ಕಿಕ್‌ ಕೊಡುವಂತೆ ನೀತು ಕುಣಿದಿದ್ದಾರೆ. ಕೃಷ್ಣ ಅವರು ಬರೆದ ಈ ಹಾಡನ್ನು ನೃತ್ಯ ನಿರ್ದೇಶಕ ಕಲೈ  ಸಂಯೋಜನೆ ಮಾಡಿದ್ದಾರೆ.

ಒಂದಷ್ಟು ನೃತ್ಯ ಕಲಾವಿದರೊಂದಿಗೆ ಹೆಜ್ಜೆ ಹಾಕಿದ ನೀತು ಅವರನ್ನು ಯೋಗಿ ತಮ್ಮ ಕ್ಯಾಮೆರಾ ಕಣ್ಣಲ್ಲಿ ಸೆರೆ ಹಿಡಿದಿದ್ದಾರೆ. ಸೆಲೆಬ್ರಿಟಿ ಡಾನ್ಸ್‌ ಶೋ ಈವೆಂಟ್‌ನ ಎಂಜಾಯ್‌ ಮಾಡಲು ಬಂದ ಮೂವರು ಹುಡುಗರು ಮತ್ತು ಮೂವರು ಹುಡುಗಿಯರ “ಹ್ಯಾಂಗೋವರ್‌’ ಕಥೆಯಿದು. ಈ ಹಾಡಿನ ಮೂಲಕ “ಹ್ಯಾಂಗೋವರ್‌’ ಚಿತ್ರೀಕರಣ ಪೂರ್ಣಗೊಂಡಿದೆ.