ಶೃಂಗೇರಿಯ ಕುರುಬಗೆರೆಯಲ್ಲಿ ಸಿಲುಕಿದ 15 ಜನರ ರಕ್ಷಿಸಿದ ಎನ್ ಡಿಆರ್ ಎಫ್, ಎಎನ್ಎಫ್ ಸಿಬ್ಬಂದಿ

ಚಿಕ್ಕಮಗಳೂರು: ತುಂಗಾ ನದಿ ಪ್ರವಾಹದಿಂದ ಶೃಂಗೇರಿಯ ಕುರುಬಗೆರೆಯಲ್ಲಿ ಸಿಲುಕಿದ 15 ಜನರನ್ನು ಶುಕ್ರವಾರ ಮಧ್ಯಾಹ್ನ ಎನ್ ಡಿಆರ್ ಎಫ್ ಹಾಗೂ ಎಎನ್ ಎಫ್ ಸಿಬ್ಬಂದಿ ರಕ್ಷಣೆ ಮಾಡಿದರು.

ಭಾರಿ ಮಳೆಯ ಕಾರಣದಿಂದ ತುಂಗಾ ನದಿಯು ತುಂಬಿ ಹರಿಯುತ್ತಿದೆ. ಹಲವು ಕಡೆಗಳಲ್ಲಿ ಪ್ರವಾಹ ಪರಿಸ್ಥಿತಿ ಉಂಟಾಗಿದೆ. ತುಂಗೆಯ ರಭಸಕ್ಕೆ ಕುರುಬಗೆರೆ, ಗಾಂಧಿ ಮೈದಾನ ಪ್ರದೇಶ ಮುಳುಗಡೆ ಆಗಿತ್ತು. ಹೀಗಾಗಿ ಇಂದು ಮುಂಜಾನೆಯಿಂದ ಇಲ್ಲಿನ 15 ಜನರು ಸಂಕಷ್ಟಕ್ಕೆ ಸಿಲುಕಿದ್ದರು.

ಜನರ ರಕ್ಷಣೆಗೆ ಬಂದ ಎನ್ ಡಿಆರ್ ಎಫ್ ಹಾಗೂ ಎಎನ್ ಎಫ್ ಸಿಬ್ಬಂದಿ ಸತತ ಎರಡು ಗಂಟೆಗಳ ಕಾರ್ಯಾಚರಣೆ ನಡೆಸಿ 15 ಜನರನ್ನು ಸ್ಥಳದಿಂದ ರಕ್ಷಿಸಿ ಸುರಕ್ಷಿತ ಸ್ಥಳಕ್ಕೆ ತರುವಲ್ಲಿ ಯಶಸ್ವಿಯಾದರು.