ಹೈದರಾಬಾದ್‌ ಕೊನೇ ನಿಜಾಮರ ಪುತ್ರ ನವಾಬ್‌ ಫ‌ಜಲ್‌ ನಿಧನ

ಹೈದರಾಬಾದ್‌ : ಹೈದರಾಬಾದಿನ 7ನೇ ಹಾಗೂ ಕೊನೆಯ ನಿಜಾಮ ಮೀರ್‌ ಉಸ್ಮಾನ್‌ ಅಲಿ ಖಾನ್‌ ಅವ ಪುತ್ರ ನವಾಬ್‌ ಫ‌ಜಲ್‌ ಜಾಹ್‌ ಬಹಾದ್ದೂರ್‌ ಅವರು ಅಲ್ಪಕಾಲದ ಅಸ್ವಾಸ್ಥದ ಬಳಿಕ ನಿಧನ ಹೊಂದಿದರೆಂದು ಹೈದರಾಬಾದಿನ ಹಿಂದಿನ ಅರಸು ಕುಟುಂಬದ ಸದಸ್ಯರೋರ್ವರು ತಿಳಿಸಿದ್ದಾರೆ. 

ನವಾಬ್‌ ಫ‌ಜಲ್‌ ಜಾಹ್‌ (72) ಅವರನ್ನು ಕಳೆದ ಗುರುವಾರ ಅನಾರೋಗ್ಯದ ಪ್ರಯುಕ ಆಸ್ಪತ್ರೆಗೆ ಸೇರಿಸಲಾಗಿತ್ತು. ಅವರು ನಿನ್ನೆ  ಭಾನುವಾರ ನಿಧನಹೊಂದಿದರು ಎಂದು 7ನೇ ನಿಜಾಮರ ಮೊಮ್ಮಗ ಮತ್ತು ನಿಜಾಮ್‌ ಕುಟುಂಬ ಕಲ್ಯಾಣ ಸಂಘದ ಅಧ್ಯಕ್ಷರಾಗಿರುವ ನವಾಬ್‌ ನಜಫ್ ಅಲಿ ಖಾನ್‌ ಹೇಳಿದರು.

“ನನ್ನ ಚಿಕ್ಕಪ್ಪ ನವಾಬ್‌ ಫ‌ಜಲ್‌ ಜಾಹ್‌ ಅವರು ಓರ್ವ ಸಭ್ಯ ಹಾಗೂ ವಿನೀತ ವ್ಯಕ್ತಿಯಾಗಿದ್ದರು; ಎಲ್ಲರಿಗೂ ಅತ್ಯಂತ ದಯಾಳುವಾಗಿದ್ದರು; ದಾನ-ಧರ್ಮಕ್ಕೆಂದು ಬಹಳಷ್ಟು ಹಣವನ್ನು ವಿನಿಯೋಗಿಸಿದ್ದರು. ಕಿಂಗ್‌ ಕೋಟಿಯಲ್ಲಿನ ಮಸ್‌ಜಿದ್‌ ಎ ಜುದಿ ಇದರ ನಿರ್ವಹಣೆಗಾಗಿಯೂ ಹಣ ವಿನಿಯೋಗಿಸಿದ್ದರು. ಅವರು 7ನೇ ನಿಜಾಮರ ಕೊನೇ ಪುತ್ರನಾಗಿದ್ದರು’ ಎಂದು ನವಾಬ್‌ ನಜಫ್ ಅಲಿ ಖಾನ್‌ ಹೇಳಿದರು. 

ನವಾಬ್‌ ಫ‌ಜಲ್‌ ಜಾಹ್‌ ಅವರನ್ನು ನಿನ್ನೆ ಸಂಜೆ ದಫ‌ನ ಮಾಡಲಾಯಿತು.