ಇಸ್ರೇಲ್‌ ಗೆ ತನ್ನ ಮಾತೃಭೂಮಿಯ ಹಕ್ಕಿದೆ: ಸೌದಿ ಕ್ರೌನ್‌ ಪ್ರಿನ್ಸ್‌

ಅಬುಧಾಬಿ : ಇಸ್ರೇಲ್‌ ಕುರಿತ ಸೌದಿ ಅರೇಬಿಯ ನಿಲುವಿನಲ್ಲಿ ಮಹತ್ತರ ಬದಲಾವಣೆ ವ್ಯಕ್ತವಾಗಿದೆ. ಇಸ್ರೇಲ್‌ ಗೆ ತನ್ನ ಮಾತೃಭೂಮಿಯನ್ನು ಹೊಂದುವ ಹಕ್ಕಿದೆ ಎಂದು ಸೌದಿ ಅರೇಬಿಯ ಯುವರಾಜ ಮತ್ತು ಪರಮೋಚ್ಚ ವಾಸ್ತವ ನಾಯಕ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಹೇಳಿದ್ದಾರೆ.

ಸೌದಿ ಅರೇಬಿಯ ಮತ್ತು ಇಸ್ರೇಲ್‌ ಈಗಲೂ ಔಪಚಾರಿಕ ರಾಜತಾಂತ್ರಿಕ ಸಂಬಂಧಗಳನ್ನು ಹೊಂದಿಲ್ಲ. ಆದಾಗ್ಯೂ ತೆರೆಮರೆಯಲ್ಲಿ, ಈಚಿನ ವರ್ಷಗಳಲ್ಲಿ ಅವುಗಳ ನಡುವಿನ ಬಾಂಧವ್ಯದಲ್ಲಿ ಮಹತ್ತರ ಸುಧಾರಣೆಗಳು ಮತ್ತು ಬೆಳವಣಿಗೆಗಳು ಆಗುತ್ತಿವೆ. 

ಇಸ್ರೇಲ್‌ ಮತ್ತು ಸೌದಿ ಅರೇಬಿಯ ಎರಡೂ ಇರಾನ್‌ ತಮ್ಮ ಅತೀ ದೊಡ್ಡ ಬಾಹ್ಯ ಬೆದರಿಕೆ ಎಂಬುದಾಗಿ ಕಾಣುತ್ತಿವೆ. ಅಮೆರಿಕವು ಉಭಯ ದೇಶಗಳಿಗೆ ಪರಮ ಮಿತ್ರನಾಗಿರುತ್ತಾ, ಅವು ಇಸ್ಲಾಮಿಕ್‌ ಸಶಸ್ತ್ರ ಉಗ್ರರಿಂದ ಅಪಾಯವಿರುವುದನ್ನು ಮುಂದಾಗಿ ಕಾಣುತ್ತಿವೆ.