ಮುಜಫ‌ರಪುರ: ದಟ್ಟ ಮಂಜು ; 9 ವಾಹನಗಳು ಪರಸ್ಪರ ಢಿಕ್ಕಿ; 1 ಸಾವು

ಪಟ್ನಾ : ಬಿಹಾರದ ಮುಜಫ‌ರಪುರ ದಲ್ಲಿ ದಟ್ಟ ಮಂಜು ಕವಿದುಕೊಂಡ ಕಾರಣ ಗೋಚರತೆ ತುಂಬ ಕಡಿಮೆ ಇದ್ದ ಸ್ಥಿತಿಯಲ್ಲಿ ಸುಮಾರು 9 ಮೋಟಾರು ವಾಹನಗಳು ಪರಸ್ಪರ ಗುದ್ದಿಕೊಂಡ ಸರಣಿ ಅವಘಡದಲ್ಲಿ ಓರ್ವ ವ್ಯಕ್ತಿ ಮೃತಪಟ್ಟು ಇತರ ಕನಿಷ್ಠ 15 ಮಂದಿ ಗಾಯಗೊಂಡರೆಂದು ಪೊಲೀಸರು ತಿಳಿಸಿದ್ದಾರೆ.

ಇಂದು ಶುಕ್ರವಾರ ಬೆಳಗ್ಗೆ ಮುಜಫ‌ರಪುರದ 28ನೇ ರಾಷ್ಟ್ರೀಯ ಹೆದ್ದಾರಿಯಲ್ಲಿ ತೈಲ ಟ್ಯಾಂಕರ್‌ ಸಹಿತ ಕನಿಷ್ಠ 9 ಮೋಟಾರು ವಾಹನಗಳು ಪರಸ್ಪರ ಗುದ್ದಿಕೊಂಡು ತೀವ್ರವಾಗಿ ಹಾನಿಗೀಡಾದವು. ಇದರ ತೀವ್ರತೆಯಲ್ಲಿ ಕೆಲವು ವಾಹನಗಳಿಗೆ ಬೆಂಕಿ ಹೊತ್ತಿಕೊಂಡಿತು. 

ಅವಘಡ ನಡೆದೊಡನೆಯೇ ಸ್ಥಳೀಯರು ಮತ್ತು ರಕ್ಷಣಾ ಕಾರ್ಯಕರ್ತರು ಸ್ಥಳಕ್ಕೆ ಧಾವಿಸಿ ಬಂದು ಗಾಯಾಳುಗಳನ್ನು ರಕ್ಷಿಸಿ ಆಸ್ಪತ್ರೆಗೆ ಸಾಗಿಸುವ ಕಾರ್ಯದಲ್ಲಿ ತೊಡಗಿಕೊಂಡರು.