ಮುಂಬಯಿ-ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿದ್ದ ಸೇತುವೆ; ಚಾಂದಿನಿ ಚೌಕ್‌ ಸೇತುವೆ ನೆಲಸಮ

ಮುಂಬೈ: ಉತ್ತರ ಪ್ರದೇಶದ ನೋಯ್ಡಾದಲ್ಲಿ ಅವಳಿ ಕಟ್ಟಡವನ್ನು ನೆಲಸಮಗೊಳಿಸಿದ ಬೆನ್ನಲ್ಲೇ, ಮಹಾರಾಷ್ಟ್ರದ ಪುಣೆಯ ಚಾಂದಿನಿ ಚೌಕ್‌ನಲ್ಲಿದ್ದ ಹಳೆಯ ಸೇತುವೆಯನ್ನು ಶನಿವಾರ ಮಧ್ಯರಾತ್ರಿ ನೆಲಸಮ ಮಾಡಲಾಗಿದೆ. ಸೇತುವೆಯನ್ನು ಮುಂಬೈ-ಬೆಂಗಳೂರು ನಡುವಿನ ರಾಷ್ಟ್ರೀಯ ಹೆದ್ದಾರಿ ಎನ್‌ಎಚ್‌4ನಲ್ಲಿ 90ರ ದಶಕದಲ್ಲಿ ನಿರ್ಮಿಸಲಾಗಿತ್ತು.

600ಕೆ.ಜಿ ಸ್ಫೋಟಕವನ್ನು ಬಳಸಿಕೊಂಡು ಶನಿವಾರ ರಾತ್ರಿ 1 ಗಂಟೆಯ ಸಮಯಕ್ಕೆ ಸೇತುವೆಯನ್ನು ನೆಲಸಮಗೊಳಿಸಲಾಗಿದೆ. ಸೇತುವೆಯ ಪಳೆಯುಳಿಕೆಗಳನ್ನೆಲ್ಲ ಸ್ಥಳಾಂತರ ಮಾಡಿದ ನಂತರ ಭಾನುವಾರ ಬೆಳಗ್ಗೆ 10 ಗಂಟೆಯ ಸಮಯಕ್ಕೆ ಹೆದ್ದಾರಿಯಲ್ಲಿ ಮತ್ತೆ ಸಂಚಾರಕ್ಕೆ ವ್ಯವಸ್ಥೆ ಮಾಡಿಕೊಡಲಾಗಿತ್ತು. ಅವಳಿ ಕಟ್ಟಡವನ್ನು ನೆಲಸಮ ಮಾಡಿದ್ದ ಎಡಿಫೈಸ್‌ ಸಂಸ್ಥೆಯೇ ಈ ಸೇತುವೆಯನ್ನೂ ವ್ಯವಸ್ಥಿತವಾಗಿ ಕೆಡವಿದೆ.

ಸೇತುವೆ ಹಳೆಯದ್ದಾಗಿದ್ದರಿಂದಾಗಿ ಅದರ ಮೇಲೆ ವಾಹನ ಓಡಾಟ ಸ್ಥಗಿತಗೊಳಿಸಲಾಗಿತ್ತು. ಇದರಿಂದಾಗಿ ಸೇತುವೆಯ ಕೆಳಭಾಗದಲ್ಲಿ ಅತಿ ಹೆಚ್ಚು ಟ್ರಾಫಿಕ್‌ ಸಮಸ್ಯೆ ಉಂಟಾಗುತ್ತಿತ್ತು.