ಶ್ರದ್ಧಾ ಕಪೂರ್ ತಾಯಿಯಾಗಿದ್ದಾಳೆ. ಅದೂ ಒಂದೆರಡಲ್ಲ , ನಾಲ್ಕು ಮಕ್ಕಳಿಗೆ. ಮಾಫಿಯಾ ಡಾನ್‌ ದಾವೂದ್‌ ಇಬ್ರಾಹಿಂನ ಸಹೋದರಿ ಹಸೀನಾ ಪಾರ್ಕರ್‌ಳ ಜೀವನ ಆಧರಿಸಿ ಹಸೀನಾ ಎಂಬ ಚಿತ್ರ ತಯಾರಾಗುತ್ತಿರುವುದು ಗೊತ್ತೇ ಇದೆ. ಇದರಲ್ಲಿ ಹಸೀನಾ ಪಾತ್ರದಲ್ಲಿ ಶ್ರದ್ಧಾ ನಟಿಸುತ್ತಿದ್ದಾಳೆ. ಹಸೀನಾಳಿಗೆ ನಾಲ್ಕು ಮಕ್ಕಳಿದ್ದಾರೆ. ಚಿತ್ರದಲ್ಲೂ ಶ್ರದ್ಧಾ ಈ ಮಕ್ಕಳ ಲಾಲನೆ-ಪಾಲನೆ ಮಾಡುವ ದೃಶ್ಯಗಳಿವೆ. ಹೀಗಾಗಿ ಶ್ರದ್ಧಾ ಮದುವೆಯಾಗದೆಯೇ ನಾಲ್ಕು ಮಕ್ಕಳ ತಾಯಿಯಾಗಿರುವುದು ಮಾತ್ರವಲ್ಲದೆ ಮಕ್ಕಳನ್ನು ನೋಡಿಕೊಳ್ಳುವ ಅನುಭವವನ್ನೂ ಪಡೆದುಕೊಂಡಿದ್ದಾಳೆ. ಆದರೆ ಇದಕ್ಕಾಗಿ ಅವಳು ಬಹಳ ಕಷ್ಟಪಟ್ಟಿದ್ದಾಳೆ. ಅದರಲ್ಲೂ ಮಕ್ಕಳಿಗೆ ಹೊಂದಾಣಿಕೆಯಾಗಲು ಇನ್ನಿಲ್ಲದಷ್ಟು ಹೆಣಗಾಡಿದ್ದಾಳಂತೆ.
ಚಿತ್ರಕ್ಕಾಗಿ ನಾಲ್ಕು ಮುದ್ದು ಮಕ್ಕಳನ್ನು ಪ್ರತಿದಿನ ಅವುಗಳ ಹೆತ್ತವರು ಕರೆತರುತ್ತಿದ್ದರು. ಶೂಟಿಂಗ್‌ ಶುರುವಾಗುವ ಮೂರ್‍ನಾಲ್ಕು ತಾಸು ಮೊದಲೇ ಶ್ರದ್ಧಾ ಸ್ಟುಡಿಯೋಕ್ಕೆ ಬರುತ್ತಿದ್ದಳು. ನಾಲ್ಕು ಮಕ್ಕಳನ್ನು ದೂರ ಕರೆದುಕೊಂಡು ಹೋಗಿ ಅವುಗಳನ್ನು ರಮಿಸುವುದನ್ನು ಕಲಿಯುತ್ತಿದ್ದಳು. ಮಕ್ಕಳ ಡಯಾಪರ್‌ ಬದಲಾಯಿಸುವುದರಿಂದ ಹಿಡಿದು ಎಲ್ಲ ಕೆಲಸವನ್ನು ಅವಳೇ ಮಾಡಬೇಕಿತ್ತು. ಚಿಕ್ಕಮ್ಮ ಪದ್ಮಿನಿ ಕೊಲ್ಹಾಪುರೆಯ ಮಗುವನ್ನು ಆಟವಾಡಿಸಿದ ಬಾಲ್ಯದ ಅನುಭವ ಅವಳಿಗೆ ಈ ಸಂದರ್ಭದಲ್ಲಿ ಬಹಳ ನೆರವಾಯಿತಂತೆ. ಹೀಗೆ, ಮಕ್ಕಳು ಶ್ರದ್ಧಾಳಿಗೆ ಹೊಂದಿಕೊಂಡ ಬಳಿಕ ನಿರ್ದೇಶಕ ಅಪೂರ್ವ ಲಖೀಯಾ ಚಿತ್ರೀಕರಣ ಪ್ರಾರಂಭಿಸುತ್ತಿದ್ದರು.
ಹಸೀನಾ ಪಾರ್ಕರ್‌ ದಾವೂದ್‌ ಸಹೋದರಿ ಎಂಬ ಕಾರಣಕ್ಕೆ ಮಾತ್ರವೇ ಕುಖ್ಯಾತಳಾಗಿರುವುದಲ್ಲ , ಒಂದು ಕಾಲದಲ್ಲಿ ಅವಳು ಮುಂಬಯಿಯ ಲೇಡಿ ಡಾನ್‌ ಆಗಿದ್ದಳು. ದಾವೂದ್‌ ಪಾಕಿಸ್ಥಾನಕ್ಕೆ ಪಲಾಯನ ಮಾಡಿದ ಬಳಿಕ ಡಿ ಕಂಪೆನಿಯ ಮುಂಬಯಿಯ ವ್ಯವಹಾರಗಳನ್ನೆಲ್ಲ ಹಸೀನಾ ನಿರ್ವಹಿಸಿ ಮುಂಬಯಿಯ ಭೂಗತ ಲೋಕದಲ್ಲಿ ಗಾಡ್‌ ಮದರ್‌ ಎಂಬ ಗೌರವಕ್ಕೆ ಪಾತ್ರಳಾಗಿದ್ದಳು. ಇಂಥ ಪಾತ್ರದಲ್ಲಿ ನಟಿಸಲು ಶ್ರದ್ಧಾ ಭಾರೀ ಕಷ್ಟಪಟ್ಟು ತಯಾರಿ ಮಾಡಿಕೊಂಡಿದ್ದಾಳೆ. ಇಷ್ಟರ ತನಕ ಬರೀ ರೊಮ್ಯಾಂಟಿಕ್‌ ಪಾತ್ರಗಳಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತಿದ್ದ ಶ್ರದ್ಧಾ ಪಾಲಿಗೆ ಇದು ಟರ್ನಿಂಗ್‌ ಪಾಯಿಂಟ್‌ ಅಂತೆ. ಚಿತ್ರಕ್ಕಾಗಿ ಅವಳು ತನ್ನ ತೂಕವನ್ನೂ ಹೆಚ್ಚಿಸಿಕೊಂಡಿದ್ದಾಳೆ. ಇನ್ನೂ ಒಂದು ವಿಶೇಷತೆಯೆಂದರೆ ಶ್ರದ್ಧಾಳ ತಮ್ಮ ಸಿದ್ಧಾಂತ್‌ ಈ ಚಿತ್ರದಲ್ಲಿ ದಾವೂದ್‌ ಆಗಿ ಅಭಿನಯಿಸುತ್ತಿದ್ದಾನೆ. ಹೀಗಾಗಿ, ಆ. 18ರಂದು ಬಿಡುಗಡೆಯಾಗಲಿರುವ ಹಸೀನಾ ಶ್ರದ್ಧಾಗೆ ಮಾತ್ರವಲ್ಲದೆ ಸಿದ್ಧಾಂತ್‌ಗೆ ಕೂಡ ಭವಿಷ್ಯವನ್ನು ನಿರ್ಧರಿಸುವ ಚಿತ್ರವಾಗಲಿದೆ.
