ಅಫ್ಘಾನ್‌ನಲ್ಲಿ ತಾಲಿಬಾನ್‌ ಅಟ್ಟಹಾಸ: 140 ಸೈನಿಕರ ಮಾರಣಹೋಮ 

ಬಾಲ್ಖ್‌ : ಅಫ್ಘಾನಿಸ್ಥಾನದಲ್ಲಿ ಶುಕ್ರವಾರ ಸಂಜೆ ತಾಲಿಬಾನ್‌ ಅಟ್ಟಹಾಸಗೈದಿದ್ದು ಸೇನಾ ಪಡೆಗಳನ್ನು ಗುರಿಯಾಗಿರಿಸಿಕೊಂಡು ಮಸೀದಿಯ ಮೇಲೆ ಹೊಂಚು ದಾಳಿ ನಡೆಸಿ 140 ಕ್ಕೂ ಹೆಚ್ಚು ಸೈನಿಕರನ್ನು ಹತ್ಯೆಗೈದಿದೆ. ಅಫ್ಘಾನ್‌ ಸೇನಾ ಪಡೆಗಳು,ಅಮೆರಿಕದ ನ್ಯಾಟೋ ಪಡೆಗಳು ಪ್ರತಿ ದಾಳಿ ನಡೆಸಿ 7 ಮಂದಿ ಉಗ್ರರನ್ನು ಹತ್ಯೆಗೈಯುವಲ್ಲಿ ಯಶಸ್ವಿಯಾಗಿವೆ.

ಅಮೆರಿಕ ಸೇನಾ ವಕ್ತಾರರು ತಿಳಿಸಿದಂತೆ ಮಝರ್‌-ಇ-ಶರೀಫ್ ಪ್ರಾಂತ್ಯದಲ್ಲಿ ಸೇನಾ ನೆಲೆಯನ್ನು ಗುರಿಯಾಗಿರಿಸಿಕೊಂಡು 10 ಮಂದಿ ಉಗ್ರರು ದಾಳಿ ನಡೆಸಿ ನಮಾಜ್‌ ಮಾಡುತ್ತಿದ್ದ ಅಫ್ಘಾನ್‌ ಸೇನೆಯ 209 ನೇ ಬೆಟಾಲಿಯನ್‌ನ ಸೈನಿಕರನ್ನು ಹತ್ಯೆಗೈದಿದೆ. 

ದಾಳಿ ನಡೆದ ಬಳಿಕ ಸ್ಥಳದಲ್ಲಿ ಅಫ್ಘಾನ್‌ ಸೇನಾ ಪಡೆ,ನ್ಯಾಟೋ ಪಡೆಗಳು ಕಾರ್ಯಾಚರಣೆ ನಡೆಸಿ 7 ಉಗ್ರರನ್ನು ಹತ್ಯೆಗೈದಿವೆ. ಇಬ್ಬರು ತಮ್ಮನ್ನು ತಾವು ಸ್ಫೋಟಿಸಿಕೊಂಡರೆ,ಓರ್ವ ಉಗ್ರನನ್ನು ಜೀವಂತವಾಗಿ ಸೆರೆ ಹಿಡಿದಿವೆ. ಸ್ಥಳದಲ್ಲಿ ಭೀಕರ ಗುಂಡಿನ ಚಕಮಕಿ ನಡೆದಿರುವ ಬಗ್ಗೆ ವರದಿಯಾಗಿದೆ. 

11 ಮಂದಿ ಅಫ್ಘಾನ್‌ ಸೈನಿಕರು ಗಾಯಗೊಂಡಿದ್ದು ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.