ಮುಂದಿನ ಎರಡು ವಾರ ವಾಡಿಕೆಗಿಂತ ಹೆಚ್ಚು ಮಳೆ

ಮುಂಬೈ: ಕಳೆದ 2 ವಾರಗಳಲ್ಲಿ ಸಾಮಾನ್ಯಕ್ಕಿಂತ ಕಡಿಮೆ ಮಳೆ ಕಂಡಿದ್ದ ಭಾರತದಲ್ಲಿ, ಮುಂದಿನ 2 ವಾರಗಳಲ್ಲಿ ವಾಡಿಕೆಗಿಂತ ಹೆಚ್ಚಿನ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.

ಮುಂದಿನ 2 ವಾರಗಳಲ್ಲಿ ನಾವು ದೇಶಾದ್ಯಂತ ಹಂಚಿಕೆಯಾಗುವಂಥ ಉತ್ತಮ ಹಾಗೂ ವಾಡಿಕೆಗಿಂತ ಹೆಚ್ಚಿನ ಮಳೆಯನ್ನು ಕಾಣಲಿದ್ದೇವೆ ಎಂದು ಇಲಾಖೆ ಮುಖ್ಯಸ್ಥ ಎ.ಕೆ.ಶ್ರೀವಾಸ್ತವ ಹೇಳಿದ್ದಾರೆ. ಜು.24ಕ್ಕೆ ಅಂತ್ಯಗೊಂಡ ವಾರದಲ್ಲಿ ವಾಡಿಕೆಗಿಂತ ಶೇ.35ರಷ್ಟು ಕಡಿಮೆ ಮಳೆ ಬಿದ್ದಿತ್ತು. ಅದಕ್ಕೂ ಮೊದಲಿನ ವಾರದಲ್ಲಿ ಶೇ.20ರಷ್ಟು ಮಳೆ ಕೊರತೆಯಿತ್ತು. ಇದು ಕೃಷಿ ವಲಯವನ್ನು ಆತಂಕಕ್ಕೀಡು ಮಾಡಿತ್ತು.

ಅಲ್ಲದೆ, ಒಟ್ಟಾರೆ ದೇಶವು ಜೂ.1ರಿಂದ ಅಂದರೆ ಮಳೆಗಾಲ ಆರಂಭವಾದಾಗಿನಿಂದ ಶೇ.17ರಷ್ಟು ಮಳೆ ಕೊರತೆ ಎದುರಿಸಿದೆ. ಆದರೆ, ಮುಂದಿನ ದಿನಗಳಲ್ಲಿ ಉತ್ತಮ ಮಳೆಯಾಗಲಿದ್ದು, ಅನ್ನದಾತರ ಮೊಗದಲ್ಲಿ ಮಂದಹಾಸ ಮೂಡಲಿದೆ ಎಂದಿದ್ದಾರೆ.