ಚೆಸ್‌ ಆಡಿ ಮತೀಯವಾದಿಗಳ ಸಿಟ್ಟಿಗೆ ಬಲಿಯಾದ ಕೈಫ್!

ನವದೆಹಲಿ: ಇತ್ತೀಚೆಗಷ್ಟೇ ಕ್ರಿಕೆಟಿಗ ಇರ್ಫಾನ್‌ ಪಠಾಣ್‌ ವಿರುದ್ಧ ಹರಿಹಾಯ್ದಿದ್ದ ಕೆಲ ಇಸ್ಲಾಂ ಮೂಲಭೂತವಾದಿಗಳ ಗಮನ ಈಗ ಮತ್ತೂಬ್ಬ ಕ್ರಿಕೆಟಿಗ ಮೊಹಮ್ಮದ್‌ ಕೈಫ್ರತ್ತ ತಿರುಗಿದೆ.

ಮಗನ ಜತೆ ಚೆಸ್‌ ಆಡುತ್ತಿರುವ ಚಿತ್ರವನ್ನು ಫೇಸ್‌ ಬುಕ್‌ನಲ್ಲಿ ಪ್ರಕಟಿಸಿದ್ದಕ್ಕೆ ಹಲವರು ವಿಪರೀತವಾಗಿ ಪ್ರತಿಕ್ರಿಯಿಸಿ, ಇದು ಇಸ್ಲಾಂಗೆ ವಿರುದ್ಧ ಎಂದಿದ್ದಾರೆ! ಕೆಲ ತಿಂಗಳುಗಳ ಹಿಂದೆ ಸೂರ್ಯ ನಮಸ್ಕಾರ ಮಾಡುತ್ತಿರುವ ಚಿತ್ರವನ್ನು ಪ್ರಕಟಿಸಿದ್ದಾಗಲೂ ಕೈಫ್ ಕೆಂಗಣ್ಣಿಗೆ ಸಿಲುಕಿದ್ದರು.

 “ಚೆಸ್‌ಗೆ ಇಸ್ಲಾಂ ವಿರುದ್ಧವಾಗಿದೆ ಬಾಯ್‌’ ಎಂದು ಒಬ್ಬ ಬರೆದಿದ್ದಾನೆ. ಮತ್ತೂಬ್ಬ ನೀವು ಇಸ್ಲಾಂಗೆ ವಿರುದ್ಧವಾದ ಕೆಲಸ ಮಾಡುತ್ತಿದ್ದೀರಿ ಎಂದು ಪ್ರಕಟಿಸಿದ್ದಾನೆ. ಮತ್ತೋರ್ವ ಇಸ್ಲಾಂ ಧರ್ಮದಲ್ಲಿ ಯಾವುದೆಕ್ಕೆಲ್ಲ ನಿಷೇಧವಿದೆ ಎನ್ನುವ ಕುರಿತು 4 ಅಂಶವನ್ನು ಪ್ರಕಟಿಸಿ ಕೈಫ್ಗೆ ಬೋಧನೆ ಮಾಡಿದ್ದಾನೆ.

ಇರ್ಫಾನ್‌ ಪತ್ನಿ ಉಗುರಿಗೆ ಬಣ್ಣ ಹಚ್ಚಿದ್ದಕ್ಕೂ ಆಕ್ರೋಶ
ಇದಾದ ಬಳಿಕ ಕ್ರಿಕೆಟಿಗ ಇರ್ಫಾನ್‌ ಪಠಾಣ್‌ ತಮ್ಮ ಪತ್ನಿ ಜತೆಗಿದ್ದ ಫೋಟೋವೊಂದನ್ನು ಪ್ರಕಟಿಸಿದ್ದರು. ಇದರಲ್ಲಿ ಅವರ ಪತ್ನಿ ಬುರ್ಖಾ ಹಾಕಿಕೊಂಡಿದ್ದರು. ಆದರೆ ಅವರ ಪತ್ನಿ ಕೈಗೆ ನೈಲ್‌ ಪಾಲಿಶ್‌ ಹಾಕಿರುವುದು ಮೂಲಭೂತವಾದಿಗಳಿಗೆ ತಪ್ಪಾಗಿ ಕಂಡಿತ್ತು. ನಮ್ಮ ಧರ್ಮದಲ್ಲಿ ನೈಲ್‌ ಪಾಲಿಶ್‌ ಹಾಕುವಂತಿಲ್ಲ. ಇದನ್ನು ನಿಮ್ಮ ಪತ್ನಿಗೆ ಸ್ವಲ್ಪ ಹೇಳಿ, ಈ ತರಹ ಮತ್ತೆ ಮಾಡಬಾರದು ಎನ್ನುವುದನ್ನು ನಿಮ್ಮ ಪತ್ನಿಗೆ ತಿಳಿಸಿ ಅಂತೆಲ್ಲ ಕೆಲವರು ಟ್ವೀಟ್‌ ಮಾಡಿದ್ದರು. ಭಾರತ ಸರ್ವ ಧರ್ಮದ ಬೀಡು. ಇಲ್ಲಿ ಎಲ್ಲರಿಗೂ ಅವರ ಇಷ್ಟದಂತೆ ಬದುಕುವ ಅವಕಾಶ ಇದೆ ಎಂದು
ಇರ್ಫಾನ್‌ ತಿರುಗೇಟು ನೀಡಿದ್ದರು.

ಪತ್ನಿಯ ಚಿತ್ರ ಹಾಕಿ ಬೈಸಿಕೊಂಡಿದ್ದ ಶಮಿ
ಭಾರತ ತಂಡದ ವೇಗಿ ಮೊಹಮ್ಮದ್‌ ಶಮಿಯೂ ಕ್ಷುಲ್ಲಕ ಕಾರಣಕ್ಕಾಗಿ ಕೆಲ ಮೂಲಭೂತವಾದಿಗಳ ಸಿಟ್ಟಿಗೆ ಬಲಿಯಾಗಿದ್ದರು. ಕೆಲ ತಿಂಗಳುಗಳ ಹಿಂದೆ ಮೊಹಮ್ಮದ್‌ ಶಮಿ ಪತ್ನಿ ಜತೆಗಿದ್ದ ಒಂದು ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿದ್ದರು. ಅಲ್ಲಿ ಪತ್ನಿ ಬುರ್ಖಾ ಹಾಕಿರಲಿಲ್ಲ. ಜೊತೆಗೆ ತೋಳುಗಳು ಬೆತ್ತಲೆಯಾಗಿ ಕಾಣಿಸುತ್ತಿದ್ದವು. ಇದರ ವಿರುದ್ಧ ಭಾರೀ ಟೀಕೆ ಕೇಳಿ ಬಂದಿತ್ತು. ಮುಸ್ಲಿಂ ಸಂಪ್ರದಾಯದಂತೆ ನಿಮ್ಮ ಪತ್ನಿಗೆ ಮುಖಮುಚ್ಚಿಕೊ ಳ್ಳಲು ಸಲಹೆ ನೀಡಿ. ಅವರಿಗೆ ಬಟ್ಟೆ ತಂದುಕೊಡಿ ಎಂದೆಲ್ಲ ಮೂಲಭೂತವಾದಿಗಳು ಟೀಕೆ ಮಾಡಿದ್ದರು. ಇದರ ವಿರುದ್ಧ ಶಮಿ ಆಕ್ರೋಶಗೊಂಡಿದ್ದರು.