30 ಸಾವಿರ ಕೋಟಿ ಲೂಟಿ ಮಾಡಿದ ಮೋದಿ: ಹಾವೇರಿಯಲ್ಲಿ ರಾಹುಲ್ ಗುಡುಗು

ಹಾವೇರಿ: ರಫೇಲ್ ಒಪ್ಪಂದದಲ್ಲಿ ಹೆಚ್ ಎಎಲ್ ಗೆ ಪ್ರಧಾನಿ ಮೋದಿ ಮೋಸ ಮಾಡಿದ್ದಾರೆ. ರಫೇಲ್ ಒಪ್ಪಂದದಲ್ಲಿ ಪ್ರಧಾನಿ ಮೋದಿ 30 ಸಾವಿರ ಕೋಟಿ ಲೂಟಿ ಮಾಡಿದ್ದಾರೆ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಗಂಭೀರ ಆರೋಪ ಮಾಡಿದ್ದಾರೆ.

ಹಾವೇರಿಯಲ್ಲಿ ಶನಿವಾರ ಮಧ್ಯಾಹ್ನ ನಡೆದ ಕಾಂಗ್ರೆಸ್ ಜನ ಪರಿವರ್ತನಾ ರ‍್ಯಾಲಿಯಲ್ಲಿ ಮಾತನಾಡಿದ ರಾಹುಲ್ ಗಾಂಧಿ, ಮೋದಿ ಅಧಿಕಾರದಲ್ಲಿ ಇಂದು ದೇಶ ಎರಡಾಗಿದೆ. ಒಂದು ಅಂಬಾನಿ, ಅದಾನಿ, ಚೋಕ್ಸಿಯವರಂತಹ ಭಾರತ. ಬ್ಯಾಂಕ್ ನ ಹಣ ಕೇವಲ 15-20 ಜನರ ಕೈಯಲ್ಲಿದೆ. ಮತ್ತೊಂದು ನಿರುದ್ಯೋಗದ ಭಾರತ ಎಂದು ಕೇಂದ್ರ ಸರಕಾರದ ವಿರುದ್ಧ ಕಿಡಿಕಾರಿದರು. 

ಅಂಬಾನಿ ಚೌಕಿದಾರ್: ನರೇಂದ್ರ ಮೋದಿ ತಾನು ದೇಶದ ಚೌಕಿದಾರ್ ಎನ್ನುತ್ತಾರೆ. ಆದರೆ ಮೋದಿ ಅನಿಲ್ ಅಂಬಾನಿಯ ಚೌಕಿದಾರ್. ಮೋದಿ ಎಲ್ಲಿಗೆ ಹೋದರೂ ಅಂಬಾನಿ, ಅದಾನಿ ಜೊತೆಗಿರ್ತಾರೆ ಎಂದು ಲೇವಡಿ ಮಾಡಿದರು.

GST- ಗಬ್ಬರ್ ಸಿಂಗ್ ಟಾಕ್ಸ್: ಜಿಎಸ್ ಟಿಯನ್ನು ಗಬ್ಬರ್ ಸಿಂಗ್ ಟ್ಯಾಕ್ಸ್ ಎಂದು ಕರೆದ ರಾಹುಲ್, ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಈಗಿರುವ ಜಿಎಸ್ ಟಿಯನ್ನು ತೆಗೆದು, ಬೇರೆ ಒಂದೇ ಜಿಎಸ್ ಟಿ, ಸುಲಭ ಜಿಎಸ್ ಟಿಯನ್ನು ಜಾರಿಗೆ ತರುವುದಾಗಿ ಘೋಷಿಸಿದರು.

ಕಳ್ಳರು ಜೈಲಿಗೆ: ನಾವು ಅಧಿಕಾರಕ್ಕೆ ಬಂದರೆ ನೀರವ್ ಮೋದಿ, ವಿಜಯ್ ಮಲ್ಯರಂತಹ ದೇಶಕ್ಕೆ ಮೋಸ ಮಾಡಿದವರನ್ನು ಜೈಲಿಗೆ ಅಟ್ಟುತ್ತೇವೆ. ಮೋದಿಯವರೇ, ನೀವು ಕಳ್ಳರಿಗೆ ಸಹಾಯ ಮಾಡಿ, ನಾವು ಬಡ ಜನರಿಗೆ ಸಹಾಯ ಮಾಡುತ್ತೇವೆ ಎಂದರು.

ಮಸೂದ್ ಅಜರ್ ನನ್ನು ಬಿಟ್ಟವರ‍್ಯಾರು?: ಇತ್ತೀಚೆಗೆ ನಡೆದ ಪುಲ್ವಾಮಾ ದಾಳಿಯ ಬಗ್ಗೆ ಮಾತನಾಡಿದ ಕಾಂಗ್ರೆಸ್ ರಾಷ್ಟ್ರೀಯ ಅಧ್ಯಕ್ಷರು, ನಾನು ದೇಶದ ಪ್ರಧಾನಿಯವರಿಗೆ ಒಂದು ಪ್ರಶ್ನೆ ಕೇಳುತ್ತೇನೆ. ಪುಲ್ವಾಮಾದಲ್ಲಿ ಹುತಾತ್ಮರಾದ ಸಿಆರ್ ಪಿಎಫ್ ಯೋಧರನ್ನು ಕೊಂದವರು ಯಾರು? ಜೈಶ್ ಎ ಮೊಹಮ್ಮದ್ ಮುಖಂಡನ ಹೆಸರೇನು? ಭಾರತದಿಂದ ಪಾಕಿಸ್ಥಾನಕ್ಕೆ ಅಜರ್ ಮಸೂದ್ ನನ್ನು ಕಳುಹಿಸಿದವರು ಬಿಜೆಪಿ ಸರಕಾರದವರಲ್ಲವೇ? ಎಂದು ಪ್ರಶ್ನಿಸಿದರು.

ಬಡ ಜನರ ಪರ ಮೈತ್ರಿ ಸರಕಾರ: ಕರ್ನಾಟಕದ ಮೈತ್ರಿ ಸರಕಾರದ ಬಗ್ಗೆ ಮಾತನಾಡಿದ ರಾಹುಲ್, ನಾವು ಕರ್ನಾಟಕದಲ್ಲಿ ಜೆಡಿಎಸ್ ನೊಂದಿಗೆ ಮೈತ್ರಿ ಮಾಡಿಕೊಂಡಿದ್ದೇವೆ. ನಮ್ಮದು ರೈತರ,ಬಡ ಜನರ, ದುರ್ಬಲ ವರ್ಗದ ಪರವಾದ ಸರಕಾರ ಎಂದರು.