Mangaluru: ಮಿನಿ ಬಸ್‌ ಪಲ್ಟಿ; 10ಕ್ಕೂ ಅಧಿಕ ಮಂದಿಗೆ ಗಾಯ

ಮಂಗಳೂರು: ಮಿನಿ ಬಸ್‌ ಮಗುಚಿ ಬಿದ್ದು 10ಕ್ಕೂ ಅಧಿಕ ಮಂದಿ ಗಾಯಗೊಂಡ ಘಟನೆ ನಂತೂರಿನಲ್ಲಿ ಶನಿವಾರ ಸಂಜೆ ಸಂಭವಿಸಿದೆ.

ಬಸ್‌ ಬೆಂಗಳೂರಿನಿಂದ ಪ್ರವಾಸಿಗರನ್ನು ಕರೆದುಕೊಂಡು ಮಂಗಳೂರು ಕಡೆಗೆ ಬರುತ್ತಿತ್ತು. ಸಂದೇಶ ಕ್ರಾಸ್‌ ಬಳಿ ಬರುತ್ತಿದ್ದಾಗ ಎದುರಿನಲ್ಲಿದ್ದ ಬೈಕ್‌ ಸವಾರ ಏಕಾಏಕಿ ಬ್ರೇಕ್‌ ಹಾಕಿದ ಪರಿಣಾಮ ಅದರ ಹಿಂದೆ ಇದ್ದ ಕಾರು ಚಾಲಕ ಕೂಡ ಬ್ರೇಕ್‌ ಹಾಕಿದ. ಇದರಿಂದಾಗಿ ಕಾರಿನ ಹಿಂದೆ ಇದ್ದ ಮಿನಿ ಬಸ್‌ ಚಾಲಕ ನಿಯಂತ್ರಣ ಕಳೆದುಕೊಂಡಿದ್ದರಿಂದ ಬಸ್‌ ರಸ್ತೆ ಪಕ್ಕದ ದಿಬ್ಬದ ಮೇಲೆ ಚಲಿಸಿ ಮಗುಚಿ ಬಿದ್ದಿತು.

ಬಸ್‌ನಲ್ಲಿ ಸುಮಾರು 20 ಮಂದಿ ಇದ್ದು ಇಬ್ಬರಿಗೆ ಗಂಭೀರ ಸ್ವರೂಪದ ಗಾಯಗಳಾಗಿವೆ. 9 ಮಂದಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.