ಬೆಂಗಳೂರಲ್ಲಿ ಮತ್ತೆ ಮಿಡಿದ ಹೃದಯ

ಬೆಂಗಳೂರು: ರಸ್ತೆ ಅಪಘಾತದಲ್ಲಿ ಮೆದುಳು ನಿಷ್ಕ್ರಿಯಗೊಂಡಿದ್ದ ರವಿ (26) ಎಂಬುವವರ ಹೃದಯವನ್ನು 40 ವರ್ಷದ ನಾಗರಾಜ್‌ ಎಂಬುವರಿಗೆ ನಾರಾಯಣ ಹೆಲ್ತ್‌ ಸಿಟಿ ವೈದ್ಯರು ಯಶಸ್ವಿಯಾಗಿ ಜೋಡಿಸಿದ್ದಾರೆ. 

ಮಂಗಳವಾರ ನಸುಕಿನಲ್ಲಿ ಸಂಚಾರ ಪೊಲೀಸರ ಸಹಾಯದಿಂದ “ಸಿಗ್ನಲ್‌ ಫ್ರೀ’ ಮೂಲಕ ಉತ್ತರಹಳ್ಳಿಯ ಬಿಜಿಎಸ್‌ ಆಸ್ಪತ್ರೆಯಿಂದ ಕೇವಲ 26 ನಿಮಿಷಗಳಲ್ಲಿ ರವಿ ಅವರ ಹೃದಯವನ್ನು ಬೊಮ್ಮಸಂದ್ರದ ಕೈಗಾರಿಕಾ ಪ್ರದೇಶದಲ್ಲಿರುವ ನಾರಾಯಣ ಹೆಲ್ತ ಸಿಟಿ ಆಸ್ಪತ್ರೆಗೆ ರವಾನಿಸಲಾಯಿತು.

ಕೊಪ್ಪಳ ಮೂಲದ ನಾಗರಾಜ್‌ ವೃತ್ತಿಯಲ್ಲಿ ರೈತರು. ಇವರಿಗೆ 2012ರಲ್ಲಿ ಹೃದಯಘಾತವಾಗಿತ್ತು. ನಾರಾಯಣ ಹೆಲ್ತ್‌ ಸಿಟಿಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಅವರಿಗೆ ರವಿ ಅವರ ಹೃದಯವನ್ನು ಜೋಡಿಸಲಾಗಿದೆ. ಈ ಹೃದಯ ಕಸಿಯನ್ನು ನಾರಾಯಣ ಹೆಲ್ತ ಸಿಟಿಯ ಹಿರಿಯ ಕಾರ್ಡಿಯೋತೋರಾಸಿಕ್‌ ಕಸಿ ಶಸ್ತ್ರಚಿಕಿತ್ಸಕರಾದ ಡಾ. ಜೂಲಿಯೆಸ್‌ ಪುನ್ನೆನ್‌ ನೇತೃತ್ವದ ವೈದ್ಯರ ತಂಡ ಯಶಸ್ವಿಯಾಗಿ ಮಾಡಿದೆ.

ಏ.16 ರಂದು ರವಿ ಬೈಕ್‌ನಿಂದ ಬಿದ್ದು ತೀವ್ರಗಾಯಗೊಂಡು ಉತ್ತರಹಳ್ಳಿಯ ಬಿಜಿಎಸ್‌ ಆಸ್ಪತ್ರೆಗೆ ದಾಖಲಾಗಿದ್ದರು. ಆದರೆ, ರವಿ ಮೆದುಳು ನಿಷ್ಕ್ರಿàಯಗೊಂಡಿರುವುದನ್ನು ವೈದ್ಯರು ಸೋಮವಾರ ಖಚಿತಪಡಿಸಿದ್ದರು. ಈ ಹಿನ್ನೆಲೆಯಲ್ಲಿ ಅಂಗಾಂಗ ದಾನಕ್ಕೆ ರವಿ ಕುಟುಂಬ ಸದಸ್ಯರು ಒಪ್ಪಿಗೆ ಸೂಚಿಸಿದ್ದರು.