ದಿಲ್ಲಿ ಮುಖ್ಯ ಕಾರ್ಯದರ್ಶಿ ಮೇಲೆ ಹಲ್ಲೆ: ಎಲ್‌ಜಿ ವರದಿ ಸಲ್ಲಿಕೆ

ಹೊಸದಿಲ್ಲಿ : ದಿಲ್ಲಿ ಸರಕಾರದ ಮುಖ್ಯ ಕಾರ್ಯದರ್ಶಿಯ ಮೇಲೆ ಹಲ್ಲೆ ನಡೆದಿದೆ ಎಂಬ ಆರೋಪದ ಕುರಿತಾಗಿ ದಿಲ್ಲಿ ಲೆ| ಗವರ್ನರ್‌ ಅನಿಲ್‌ ಬೈಜಾಲ್‌ ಅವರು ಸಿದ್ಧಪಡಿಸಿರುವ ವರದಿಯು ಗೃಹ ಸಚಿವಾಲಯವನ್ನು ಇಂದು ಬುಧವಾರ ತಲುಪಿರುವುದಾಗಿ ತಿಳಿದು ಬಂದಿದೆ. 

ದಿಲ್ಲಿ ಎಲ್‌ಜಿ ಅವರ ವರದಿಯನ್ನು ಸ್ವೀಕರಿಸಲಾಗಿದೆ; ಅದೀಗ ಪರಿಶೀಲನೆಯಲ್ಲಿದೆ. ಈ ಪ್ರಕರಣದ ಕ್ರಿಮಿನಲ್‌ ವಿಷಯವನ್ನು ದಿಲ್ಲಿ ಪೊಲೀಸರು ಕೈಗೆತ್ತಿಕೊಳ್ಳುತ್ತಾರೆ; ಗೃಹ ಸಚಿವಾಲಯವು ಇದರಲ್ಲಿನ ಆಡಳಿತಾತ್ಮಕ ವಿಷಯಗಳನ್ನು ಪರಿಶೀಲಿಸಲಿದೆ; ಸರಕಾರಿ ಅಧಿಕಾರಿಯೊಂದಿಗಿನ ಅನುಚಿತ ವರ್ತನೆಯನ್ನು ಗಂಭೀರವಾಗಿ ಪರಿಗಣಿಸಲಾಗುವುದು’ ಎಂದು ಗೃಸ ಸಚಿವಾಲಯದ ಅಧಿಕಾರಿ ತಿಳಿಸಿದ್ದಾರೆ. 

ದಿಲ್ಲಿ ಸರಕಾರದ ರಾಜಕೀಯ ಕಾರ್ಯನಿರ್ವಹಣಾಧಿಕಾರಿಗಳು ಮತ್ತು ಅಧಿಕಾರಶಾಹಿ ನಡುವಿನ ಕ್ರಿಯಾ ಬಾಂಧವ್ಯವನ್ನು ಕೂಡ ಸಚಿವಾಲಯ ಪರಿಶೀಲಿಸಲಿದೆ ಎಂದವರು ಹೇಳಿದರು.