ಶೀರೂರು ಶ್ರೀ ಹೇಳಿಕೆ: ಮಠಾಧೀಶರ ಸಭೆ

ಉಡುಪಿ: ಶೀರೂರು ಶ್ರೀಗಳು ಇತರ ಅಷ್ಟಮಠಾಧೀಶರ ಕುರಿತು ಇತ್ತೀಚೆಗೆ ಸಾಮಾಜಿಕ ಜಾಲತಾಣ ಮತ್ತು ದೃಶ್ಯ ಮಾಧ್ಯಮಗಳಲ್ಲಿ ಮಾಡಿದ ಟೀಕೆ ಕುರಿತು ಗುರುವಾರ ರಾತ್ರಿ ಶ್ರೀಕೃಷ್ಣ ಮಠದಲ್ಲಿ ಮಠಾಧೀಶರು ಸಭೆ ನಡೆಸಿದರು. ಪುತ್ತಿಗೆ ಸ್ವಾಮೀಜಿಯವರು ಉಡುಪಿಯಲ್ಲಿರಲಿಲ್ಲ, ಉಳಿದಂತೆ ಪರ್ಯಾಯ ಪಲಿಮಾರು ಸ್ವಾಮೀಜಿ ಸಹಿತ ಆರು ಮಠಗಳ ಸ್ವಾಮೀಜಿಗಳು ಸಭೆಯಲ್ಲಿ ಉಪಸ್ಥಿತರಿದ್ದರು. ಕಿರಿಯ ಸ್ವಾಮೀಜಿ ಸಹಿತ ಒಟ್ಟು ಎಂಟು ಸ್ವಾಮೀಜಿಗಳಿದ್ದರು.

ಇದೊಂದು ಗಂಭೀರ ಪ್ರಕರಣವಾದ ಕಾರಣ ವಿಶ್ರಾಂತಿಗಾಗಿ ಬೆಂಗಳೂರಿಗೆ ತೆರಳಿದ್ದ ಪೇಜಾವರ ಶ್ರೀಗಳು ಆಗಮಿಸಿ ಸಭೆಯಲ್ಲಿ ಭಾಗವಹಿಸಿದ್ದರು. ಸಭೆಯಲ್ಲಿ ನಡೆದ ಸಂವಾದದ ಬಗ್ಗೆ ಮಾಧ್ಯಮದವರಿಗೆ ಯಾವುದೇ ಮಾಹಿತಿ ನೀಡಿಲ್ಲ, ಮುಂದೆ ಒದಗಿಸುವುದಾಗಿ ಮಾಧ್ಯಮದವರಿಗೆ ತಿಳಿಸಲಾಯಿತು. ಕೇವಲ ಮಠಾಧೀಶರು ಮಾತ್ರ ಉಪಸ್ಥಿತರಿದ್ದ ಸಭೆಗೆ ಇನ್ಯಾರಿಗೂ ಪ್ರವೇಶವಿರಲಿಲ್ಲ.

ಶೀರೂರು ಸ್ವಾಮಿಗಳು ಶ್ರೀಕೃಷ್ಣ ಮಠದ ಪರ್ಯಾಯದ ಬಗೆಗೆ ಮತ್ತು ಇತರ ಸ್ವಾಮೀಜಿಗಳ ವಿರುದ್ಧ ಮಾಡಿದ ಆರೋಪ ಸತ್ಯಕ್ಕೆ ದೂರವಾದುದು ಎಂದು ತಿಳಿಸಿದ ಸಭೆಯು ಆರೋಪಕ್ಕೆ ಸೂಕ್ತ ಪರಿಹಾರವನ್ನು ಕಾನೂನು ಪ್ರಕಾರ ಹೇಗೆ ಕಂಡುಕೊಳ್ಳಬಹುದು ಎಂದು ಚಿಂತನೆ ನಡೆಸಿತು ಎಂದು ಬಲ್ಲ ಮೂಲಗಳಿಂದ ತಿಳಿದುಬಂದಿದೆ.