Vellore: ವೈದ್ಯ ವಿದ್ಯಾರ್ಥಿ ಹೇಳಿದ ಆ ಒಂದು ಮಾತಿಗೆ ಸಿಟ್ಟಾದ ಮಹಿಳಾ ರೋಗಿ ಮತ್ತು ಸ್ನೇಹಿತ

ತಮಿಳುನಾಡು: ತಮಿಳುನಾಡಿನ ವೆಲ್ಲೂರಿನಲ್ಲಿರುವ ಸರ್ಕಾರಿ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಸ್ನಾತಕೋತ್ತರ ವೈದ್ಯಕೀಯ ವಿದ್ಯಾರ್ಥಿಯೊಬ್ಬನ ಮೇಲೆ ಮಹಿಳಾ ರೋಗಿ ಮತ್ತು ಆಕೆಯ ಸ್ನೇಹಿತ ಹಲ್ಲೆ ನಡೆಸಿದ ಘಟನೆಯೊಂದು ಬೆಳಕಿಗೆ ಬಂದಿದೆ.

ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಇದರಲ್ಲಿ ಮಹಿಳಾ ರೋಗಿಯಾಗಿರುವ ಸುಭಾ(36) ಅವರು ವೈದ್ಯಕೀಯ ವಿದ್ಯಾರ್ಥಿಗೆ ಚಪ್ಪಲಿಯಿಂದ ಹೊಡೆಯುತ್ತಿರುವುದು ಕಾಣಬಹುದು.

ಆಗಿದ್ದೇನು ?
ಕಳೆದ ವಾರದಿಂದ ಸುಭಾ ಅವರು ಅನಾರೋಗ್ಯದಿಂದ ಬಳಲುತ್ತಿದ್ದು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ದಿವಾಕರ್ ಆಸ್ಪತ್ರೆಯಲ್ಲಿ ಸುಭಾ ಅವರನ್ನು ಭೇಟಿಯಾಗಲು ಬಂದಿದ್ದರು ಅಲ್ಲದೆ ರೋಗಿಯ ಹಾಸಿಗೆಯಲ್ಲಿ ಕುಳಿತಿದ್ದರು ಎಂದು ವರದಿಯಾಗಿದೆ.

ಆಸ್ಪತ್ರೆಯ ವೈದ್ಯಕೀಯ ವಿದ್ಯಾರ್ಥಿಯಾಗಿರುವ ವಿಶಾಲ್ ತನ್ನ ಕರ್ತವ್ಯದಲ್ಲಿದ್ದ ವೇಳೆ ಮಹಿಳಾ ವಾರ್ಡ್ ನಲ್ಲಿ ವ್ಯಕ್ತಿಯೊಬ್ಬ ಕುಳಿತಿರುವುದು ಕಂಡು ಬಂದಿದೆ, ಆ ವೇಳೆ ವಾರ್ಡ್ ಗೆ ಬಂದ ವಿದ್ಯಾರ್ಥಿ ಮಹಿಳಾ ರೋಗಿಯ ಜೊತೆಗಿದ್ದ ವ್ಯಕ್ತಿಯಲ್ಲಿ ಇದು ಮಹಿಳೆಯರ ವಾರ್ಡ್ ಇಲ್ಲಿ ಗಂಡಸರು ಇರುವಂತಿಲ್ಲ ಎಂದು ಹೇಳಿದ್ದಾನೆ ಇಷ್ಟು ಹೇಳಿದ ವಿಚಾರಕ್ಕೆ ಕೋಪಗೊಂಡ ವ್ಯಕ್ತಿ ವಿದ್ಯಾರ್ಥಿ ಜೊತೆ ಜಗಳಕ್ಕೆ ಮುಂದಾಗಿದ್ದಾನೆ. ಅಲ್ಲದೆ ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆದು ಹೊಡೆದಾಟ ಶುರುವಾಗಿದೆ ಅಷ್ಟರಲ್ಲೇ ವ್ಯಕ್ತಿಯ ಜೊತೆಗಿದ್ದ ಮಹಿಳಾ ರೋಗಿ ವೈದ್ಯ ವಿದ್ಯಾರ್ಥಿಯ ಮೇಲೆ ಚಪ್ಪಲಿಯಿಂದ ಹಲ್ಲೆ ನಡೆಸಿದ್ದಾಳೆ.

ಗಲಾಟೆ ಜೋರಾದ ಕಾರಣ ಆಸ್ಪತ್ರೆಯಲ್ಲಿದ್ದ ಇತರ ಸಿಬಂದಿ ಬಂದು ಜಗಳ ಬಿಡಿಸಿದ್ದಾರೆ, ಈ ಘಟನೆ ಅಲ್ಲಿನ ಆಸ್ಪತ್ರೆಯ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ, ಅಲ್ಲದೆ ಘಟನೆ ಸಂಬಂಧ ವೈದ್ಯ ವಿದ್ಯಾರ್ಥಿಯ ದೂರಿನ ಮೇರೆಗೆ ಸುಭಾ ಮತ್ತು ಆಕೆಯ ಸ್ನೇಹಿತ ದಿವಾಕರ್ ಇಬ್ಬರನ್ನೂ ವೆಲ್ಲೂರು ತಾಲೂಕು ಪೊಲೀಸರು ಬಂಧಿಸಿದ್ದಾರೆ.